BYD Uzbekistan Factory компанияси электромобилларнинг маҳаллий иқлим ва йўл шароитларига мослаштирилмагани ҳамда расмий кафолатга эга бўлмагани важи билан тартибсиз импортни чеклаш бўйича ҳукуматга мурожаат билан чиқди.
Бу ҳақда президентнинг “Ўзбекистон Республикасида электромобиль ва гибрид автомобиллар ҳамда уларнинг бутловчи қисмларини ишлаб чиқаришни ташкил этиш” инвестиция лойиҳасини амалга ошириш тўғрисидаги инвестиция шартномасини тасдиқлаш ҳақида”ги қарорида қайд этилган.
Шу муносабат билан Иқтисодиёт ва молия, Инвестициялар, саноат ва савдо вазирликлари ҳамда “Ўзавтосаноат” компаниясига 2024 йил 1 июлга қадар Вазирлар Маҳкамасига BYD бренди остидаги электромобиль ва гибрид автомобиллари импортини тартибга солиш бўйича таклифлар киритиш топширилган.
Бунда масъуллар амалдаги қонунчилик ҳужжатлари, жумладан, рақобат тўғрисидаги қонунчилик ҳужжатлари ҳамда Жаҳон савдо ташкилоти принципларидан келиб чиқиб таклифларни тайёрлаши керак.
Эслатиб ўтамиз, 2022 йил 29 декабрда “Ўзавтосаноат” АЖ ва BYD Эуропе Б.V. (Нидерландия қироллиги) компанияси иштирокида масъулияти чекланган жамият шаклида BYD Uzbekistan Factory қўшма корхонаси таъсис этилганди.
Изоҳ (0)