Франциянинг Orano компанияси Ўзбекистонда уран қазиб олиш ва қайта ишлашга 500 миллион долларгача сармоя киритади. Бу ҳақда тоғ-кон саноати ва геология вазири Бобур Исломов Самарқандда ўтган Верона Евроосиё иқтисодий форумида Spot’га маълум қилди.
Вазирнинг қайд этишича, Ўзбекистонда Orano билан стратегик шериклик тўғрисида шартнома имзоланган. Франция компанияси ҳозирда геология-қидирув ишларини олиб бормоқда, 2023 йил охиригача лойиҳанинг дастлабки техник-иқтисодий асослари ишлаб чиқилади.
“Стратегик келишувда [Navoiy viloyatining Tomdi tumanidagi] иккита қўшимча майдонда бўлиши кўрсатилган, уларда [Orano] геологик қидирув ишларини олиб боради. Барчаси, албатта, техник-иқтисодий асослаш ҳал қилинади, ҳозирча ҳаммаси ижобий кетмоқда. Умумий сармоянинг жами ҳажми шартномада 500 миллион долларгача қилиб белгиланган”, — деган Бобур Исломов.
Унинг билдиришича, уран ишлаб чиқаришнинг мавжуд ҳажмлари аллақачон савдо бозорларини топган. Ядро ёқилғисини ишлаб чиқариш ҳажми ошишига билан Ўзбекистон нархлар конюнктурасидан келиб чиқиб экспорт қилиш тўғрисида қарор қабул қилади.
“Уран бўйича ким билан ишлашишимиздан қатъий назар, биз жаҳон нархларига асосланганмиз. Агар нарх кўтарилса, бизда ҳамма нарса формулаларга боғлиқ ва етказиб бериш нархимиз ҳам кўтарилади”, — дейди Бобур Исломов.
Шунингдек, 2023 йилда барча йўналишларда уран экспорти ошганини маълум қилиб, етказиб беришни диверсификация қилиш муҳимлигини айтди.
Франция президенти Эммануэл Макроннинг мамлакатга ташрифи доирасида Orano Ўзбекистонда геология-қидирув ишлари ва уран қазиб чиқариш соҳасида янги лойиҳаларни амалга ошириши маълум бўлганди. Ундан аввалроқ Bloomberg Франция президенти Ўзбекистон ва Қозоғистонга ташрифидан мақсад уран етказиб беришни кўпайтириш масаласини муҳокама қилиш эканлигини ёзганди.
Изоҳ (0)