Шимолий Корея 18 март куни эрталаб Япон денгизи томон иккита баллистик ракета учирди, уларнинг иккаласи ҳам Япониянинг эксклюзив иқтисодий зонаси ташқарисига тушди. Бу ҳақда Япония Мудофаа вазирлигига таяниб, NHK телеканали хабар берди.
Мудофаа вазирлиги маълумотларига кўра, биринчи парвоз 07:46 (Тошкент вақти билан 03:46), иккинчиси тахминан 40 дақиқадан сўнг амалга оширилган. Иккала ракета ҳам Япониянинг эксклюзив иқтисодий зонасидан ташқарига тушган.
Япония Мудофаа вазирлиги ахборотни таҳлил қилиш ва вазиятни кузатишда давом этмоқда. Денгиздаги кемаларга ҳушёр бўлиш ва келаётган маълумотларни кузатиш тавсия этилган.
Япония ҳукумати Бош вазир ҳузурида маълумот тўплаш ва эҳтимолий зарарни баҳолаш учун бўлим бошлиқлари гуруҳини чақирган. Айни пайтда Yonhap агентлиги Жанубий Корея ҳарбийларига таяниб, Пхеньян қисқа масофага учувчи бир нечта ракеталарни учиргани ҳақида хабар бермоқда. Уларнинг аниқ сони маълум эмас.
Жанубий Корея Бирлашган штаб бошлиқлари қисқа масофали баллистик ракеталар Шимолий Хванхе провинциясидаги Сангвон шаҳридан маҳаллий вақт билан эрталаб соат 7:44 да учирилганини айтган.
Бизнинг армиямиз қўшимча парвозларга тайёргарлик кўришда кузатув ва ҳушёрликни оширди. Шимолий Корея баллистик ракеталарини учиришга оид маълумотларни АҚШ ва Япония расмийлари билан бўлишиш орқали биз тўлиқ шайликни сақлаб қоламиз, — дея ҳарбийларнинг сўзларидан иқтибос келтирган агентлик.
Таъкидланишича, баллистик ракеталар АҚШ давлат котиби Энтони Блинкен Сеулга келган куни учирилган. Давлат департаменти раҳбари 30 га яқин давлатдан юқори даражадаги ҳукумат амалдорлари таклиф этилган саммитда иштирок этиш учун Жанубий Кореяга келган.
Изоҳ (0)