Шавкат Мирзиёев 15 март куни Қозоғистон бош вазири Олжас Бектенов бошчилигидаги ҳукумат делегациясини қабул қилди. Бу ҳақда Президент матбуот хизмати хабар берди.
Қайд этилишича, давлат раҳбари бош вазир Олжас Бектановни яқинда ушбу лавозимга тайинлангани билан қутлади ва масъулиятли фаолиятида катта муваффақиятлар тилади. Ўз навбатида, Қозоғистон ҳукумати раҳбари Ўзбекистон президентига Қозоғистон президенти Қосим-Жўмарт Тўқаевнинг саломи ва тилакларини етказди.
Учрашувда Ўзбекистон билан Қозоғистон ўртасидаги кўп қиррали шерикликни янада кенгайтириш масалалари кўриб чиқилди. Хусусан, бўлажак олий даражадаги қўшма тадбирларга тайёргарлик доирасида ҳамкорликнинг янги кун тартибини шакллантиришга эътибор қаратилди. Ўзаро товар айирбошлаш ҳажмини ошириш жараёнида, шу жумладан, ваколатли вазирлар бошчилигидаги ишчи гуруҳ доирасида тўсиқларни бартараф этиш ва ўзаро келишилган чораларни кўриш зарурлиги қайд этилди.
Мамлакатлар стратегик шериклигида муҳим йўналишлар бўлган саноат, транспорт ва логистикада кооперацияни кенгайтириш масалалари муҳокама қилинди. Устувор тармоқлардаги инвестиция дастурларининг янги портфелини ҳамда транспорт ва энергетика соҳасидаги минтақавий аҳамиятга эга инфратузилмавий лойиҳаларни фаол илгари суриш мақсадга мувофиқ экани таъкидланди.
Ўзбекистон президенти Ўзбекистон ва Қозоғистон ўртасидаги ўзаро манфаатли ҳамкорликни тубдан кенгайтириш мақсадида ҳукуматлар даражасида яқин ва тизимли алоқаларни давом эттириш муҳимлигини қайд этди.
Изоҳ (0)