Коррупцияга қарши курашиш агентлиги Наманган ва Сирдарёда ўтган йилда мансабдорлик ва коррупцияга оид содир этилган жиноятлар сонини очиқлади.
Маълум қилинишича, Наманган ва Сирдарё вилоятларида коррупцияга қарши курашишда йўл қўйилган камчиликларни бартараф этиш тўғрисида тақдимномалар киритилди. 2023 йилда Наманганда мансабдорлик ва коррупцияга оид ҳолатлар юзасидан 213 та, Сирдарёда 324 та жиноят содир этилган.
Наманганда давлат органлари ва ташкилотлари томонидан бюджет маблағларидан фойдаланиш билан боғлиқ 371 та ҳолатда 85,5 миллиард сўмлик, Сирдарёда эса 201 та ҳолатда 44,8 миллиард сўмлик молиявий хато ва камчиликларга йўл қўйилган.
Наманганда ҳокимликларнинг 9 нафар, қурилиш соҳасининг 3 нафар, соғлиқни сақлаш соҳасининг 15 нафар мансабдор шахси, Сирдарёда эса туман ҳокимлигининг 1 нафар, қурилиш соҳасининг 5 нафар, соғлиқни сақлаш соҳасининг 4 нафар мансабдор шахси тадбиркорлик фаолияти билан шуғулланиб келаётгани маълум бўлди.
Қайд этилишича, ҳудудлардаги тиббиёт муассасаларида бўш иш ўринлари мавжуд бўлса-да, ходимлар (Наманганда 49,6 фоизи, Сирдарёда 66,0 фоизи) тўлиқсиз ставкада фаолият олиб бормоқда. Ўтган йилда Тўрақўрғон туман тиббиёт бирлашмасида 33 нафар ўрта тиббиёт ходимлари ишга қабул қилинган бўлиб, шундан 9 нафарининг танлов асосида ишга қабул қилинганини тасдиқловчи баённома мавжуд эмас. Сирдарё вилоятида эса 52 нафар шифокор, 158 нафар ўрта тиббиёт ходимлари танловсиз ишга қабул қилинган.
Ўрганишлар якуни бўйича Наманган ва Сирдарё вилояти коррупцияга қарши курашиш ҳудудий кенгаши (вилоят ҳокимлари)га юқорида келтирилган камчиликлар ҳамда коррупцияни келтириб чиқарувчи сабаб ва шарт-шароитларни бартараф этиш чораларини кўриш тўғрисида тақдимномалар киритилди.
Изоҳ (0)