Анголада сеҳргарликда айбланган 50 дан ортиқ одам қора кучлар билан мулоқот қилганликни текшириш учун тайёрланган суюқликни ичишга мажбурланганидан кейин вафот этди. Бу ҳақда маҳаллий полиция маълум қилди, дея хабар беради Frans Press.
“50 дан ортиқ одам сирли суюқлик ичишга мажбур бўлди, бу, жамоат оқсоқолларининг фикрига кўра, одам сеҳргарлик билан шуғулланадими ёки йўқлигини аниқлай оладиган суюқлик бўлган”, — деди Камакупа муниципалитети ходими Лузиа Филемоне.
Ўз навбатида, маҳаллий полиция бошлиғи Антонио Самба сўнгги икки ой ичида ушбу суюқликни ичиш оқибатида вафот этганлар сони 30 дан 50 нафарга кўпайганини айтди.
Анголада сеҳргарлик билан шуғулланувчиларни жавобгарликка тортадиган қонун йўқ. Бироқ қишлоқ аҳолиси орасида бутун жамиятга бахтсизлик келтира оладиган сеҳргарлар мавжудлигига ишониш кенг тарқалган. Натижада, қора кучлар билан алоқа қилишда гумон қилинган одамлар “мбулунго” деб номланувчи махсус ўсимлик суюқлигини ичишга мажбур қилинади.
Афсонага кўра, агар одам уни ичганидан кейин вафот этса, бу унинг сеҳргарлик билан шуғулланганлигини исботлайди.
Изоҳ (0)