Россия ҳукумати мамлакат фуқароларини сайлов куни митинг ва намойишлар ташкил этганлик учун жиноий жавобгарликка тортиш тўғрисида огоҳлантирди. Бу ҳақда The Moscow Times нашри хабар берди.
Хабарда айтилишича, Кремлнинг марҳум танқидчиси Алексей Навальний тарафдорлари 17 март куни сайлов участкаларига бориб, намойишлар ташкил этишни режалаштирган. 17 март Россияда президентлик сайловида овоз беришнинг сўнгги куни ҳисобланади. Ушбу кунда рус мухолифати сайланишга номзодлар орасида мамлакатни бошқаришга муносиб номзод йўқлигини сабаб қилиб, сайлов жараёнларига халақит қилишни режалаштиргани айтилган.
Москва ҳукумати Владимир Путинга қаршилик билдиришга қаратилган намойишларда қатнашганларни жиноий жавобгарликка тортиш билан таҳдид қилган. Ушбу тартибга қарши чиқиб, оломон ташкил қилганлар қонун олдида жавоб бериши маълум қилинган.
Ҳукумат баёнотига кўра, норасмий манбалар русларни сайлов участкаларида ғалаён кўтаришга ундаб, чақириқлар қилмоқда. Ушбу ҳаракатларга қарши эса ҳукумат жиддий курашишни мақсад қилган.
Расмий идоралар намойишчиларга нисбатан Жиноят кодекси 141-моддасини ишга туширишни режа қилгани айтилган. Унга кўра, Россияда сайловга ёки фуқароларнинг сайлов ҳуқуқларига тўсқинлик қилиш беш йилгача озодликдан маҳрум қилиш билан жазоланади.
“Ушбу оммавий тадбирларни ташкил этиш ва унда иштирок этиш амалдаги қонунчиликка мувофиқ жазоланади”, — дейилади ҳукумат расмий баёнотида.
Изоҳ (0)