Болгария 1 апрелдан илк марта Россия фуқароларига Шенген визалари беришни бошлайди. Бу ҳақда Болгариянинг Москвадаги элчихонасига таяниб ‘‘ТАСС’’ хабар берди.
Аризаларни топшириш ва кейинчалик Шенген визаларини бериш 2024 йилнинг 1 апрелидан бошланади. Болгариянинг Москвадаги элчихонаси консуллик хизмати ва Санкт-Петербургдаги Бош консуллиги Шенген визаси учун аризаларни топшириш билан шуғулланади, – дейди элчихона.
Улар, шунингдек, ҳужжатларни топшириш учун навбат кутиш муддати бошқа Шенген мамлакатларидаги каби бўлишини таъкидлаган.
Элчихонага кўра, сайёҳлар 2024 йил 31 мартгача берилган қисқа муддатли миллий визалар C типидаги – мамлакатда 90 кунгача бўлган ҳолда – фақат Болгарияга кириш ва Руминия ҳамда Кипрга саёҳатлар учун фойдаланишлари мумкин. Ўша санадан олдин республика ҳудудида 90 кундан ортиқ қолишга рухсат берилган D туридаги узоқ муддатли визалар эса бошқа Шенген мамлакатларига қисқа муддатли саёҳатлар учун имконият яратади.
2023 йил 31 декабрда Европа Иттифоқи Кенгаши Болгарияга нисбатан “қисман Шенген”ни жорий этишга қарор қилган. Жорий йилнинг 31 мартидан бошлаб Болгария фуқаролари учун Европа Иттифоқининг ички ҳаво ва денгиз чегараларида текширувлар бекор қилинади, лекин қуруқликдаги чегаралардаги текширувлар сақланиб қолади.
Изоҳ (0)