Sirdaryo viloyatida 2023-yilda tashkil etilgan 2 ming 824 ta yakka tartibdagi tadbirkorlik subyektlarining 53,8 foizi faoliyatini to‘xtatib qo‘ygan. Bu haqda Mahallabay ishlash va tadbirkorlikni rivojlantirish agentligi direktoriga yuborilgan senator so‘rovida aytib o‘tilgan.
Ta’kidlanishicha, viloyatda hokim yordamchilari ko‘magida mikroloyihalar va mikromarkazlar tashkil etish hisobiga aholi bandligining ta’minlanishi rejaga nisbatan atigi 36 foizni tashkil qilgan.
Imkoniyat va shart-sharoitlar yetarli bo‘lishiga qaramasdan, Guliston shahrida “ayollar daftari”ga kiritilgan 890 nafar ishsiz xotin-qizdan atigi 15 nafari doimiy mehnat bilan band. Oqoltin tumani va Shirin shahrida esa bunday toifadagi xotin-qizlar bandligini ta’minlashda subsidiyalash mexanizmidan umuman foydalanilmagan.
Viloyatda 2023-yil mobaynida “20 ming tadbirkor — 500 ming malakali mutaxassis” dasturi doirasida 24 ta tadbirkorlik subyekti tomonidan tijorat banklariga jami 112,8 milliard so‘mlik kredit olish uchun kiritilgan arizalarning 17 tasiga avtomatik skoring tahlili orqali ijobiy xulosa berilgan bo‘lsa-da, amalda bor-yo‘g‘i 2 nafar tadbirkorga kredit ajratilgan.
Hokimliklarga aholi va tadbirkorlik subyektlarining tadbirkorlik masalasidagi murojaatlari soni o‘tgan yilga nisbatan 2 barobarga oshgan, — deyiladi Senat axborotida.
Yuqoridagilardan kelib chiqib, Senat agentlik direktoridan amalga oshirilayotgan ishlar bo‘yicha asoslantirilgan tushuntirish berishni so‘ragan. Shuningdek, so‘rovda mahallada bo‘sh turgan bino-inshootlar va yer maydonlarini aniqlash, ularni belgilangan tartibda auksion savdolariga chiqarish yuzasidan ma’lumot taqdim etilishi ko‘rsatib o‘tilgan.
Izoh (0)