ДХХ ўтказган тезкор тадбирда Самарқанд ва Фарғона вилоятларида сифати кафолатланмаган ҳамда тегишли ҳужжатлари бўлмаган дори воситалари савдосига чек қўйилди.
Самарқанд вилоятида ўтказилган тадбирда Пастдарғом туманида яшовчи, 1999 йилда туғилган фуқаро Хитойда ишлаб чиқарилган 3600 дона “S-Gen” номли дори воситаларини 46 миллион сўмга сотган вақтида ушланган.
Шунингдек, ундан мазкур дориларнинг гўёки давлат рўйхатидан ўтказилгани тўғрисидаги сохта мувофиқлик сертификати ҳам ашёвий далил сифатида олинган.
Бундан ташқари, унинг яшаш хонадонидан сифати кафолатланмаган ва тегишли ҳужжатлари бўлмаган 240 дона “ViVaNarin” номли дори воситаси ҳам процессуал тартибда расмийлаштириб олинган.
ДХХнинг Фарғона вилояти бўйича бошқармаси ходимлари томонидан вилоят божхона бошқармаси билан ҳамкорликда ўтказилган тезкор тадбирда эса Қўқон шаҳрида яшовчи, 1989 йилда туғилган фуқаро умумий қиймати 121 миллион 800 минг сўмлик, 2400 дона “Ампициллин”, 1600 дона “Infera”, 1600 дона “Ферровелл железа гидроксид сахарозний комплекс” ва 125 дона “Гонадотропин хорионический” номли дори воситаларини Наманган шаҳридаги дорихоналарга юбормоқчи бўлган вақтида ашёвий далиллар билан ушланди.
Соғлиқни сақлаш вазирлиги ҳузуридаги “Фармацевтика маҳсулотлари хавфсизлиги маркази” давлат муассасасининг хулосасига кўра, ушбу дорилар дори воситалари ва тиббий буюмлар Давлат реестрига рўйхатга олинмагани ҳамда Сертификатлаштириш идоралари томонидан мувофиқлик сертификатлари расмийлаштирилмагани ва сақлаш шароитига амал қилинмагани сабаб, уларни республика ҳудудида сотиш, ташиш ва тиббиёт амалиётида қўллаш тақиқланади.
Таъкидланишича, мазкур шахс муқаддам шу турдаги жиноятни содир этгани учун 2023 йил Маъмурий жавобгарлик тўғрисидаги кодекснинг 165-1-моддаси билан жарима жазосига тортилган.
Изоҳ (0)