11 март куни Украина Мудофаа вазирлиги разведка бошқармаси раҳбари Кирилл Буданов Украина кучлари Қримда “жиддий операция” ўтказишга тайёрланаётганини маълум қилган. Бу ҳақда “ТАСС” нашри батафсил маълумот берган.
“Қора денгиздаги ҳаракатларимиз Қримдаги жиддий операцияга тайёргарлик кўраётганимиз ишорасидир”, — дея баёнот берган Кирилл Буданов.
Украина ҳарбий разведка агентлиги берган маълумотга кўра, Украина қўшинларининг 2022—2023 йилларда Қора денгиз минтақасидаги барча ҳаракатлари стратегик режа билан боғлиқ. Украина қўшинлари Херсон вилоятидаги Днепр дарёсининг чап қирғоғига ҳужум қилишга уриниши ҳам худди шу мақсадга хизмат қилган.
Хабарда айтилишича, Украина қуролли кучларининг маълум операциялар ҳақидаги сўнгги даъволари Ғарб иттифоқчиларидан ёрдам етказиб беришда сезиларли кечикишлар фонида эшитилмоқда. АҚШ Конгресси бир неча ойдан бери Киевни қўллаб-қувватлаш учун сарфланиши назарда тутилган харажатлар пакетини тасдиқлай олмаяпти. Айни пайтда Европа Иттифоқи давлатларидан етказиб берилаётган таъминот эса Украина армиясининг барча эҳтиёжларини қопламайди.
2023 йил июнь ойининг бошидан бери Украина қуролли кучлари бир қанча муваффақиятсиз ҳужумлар ташкил этган. Бу эса жиддий йўқотишларга олиб келган. Натижада, Ғарб оммавий ахборот воситалари иттифоқчиларнинг узоқ давом этган можародан чарчагани ҳақидаги мақолалар чоп эта бошлади. Киев ўзининг жанговар муваффақиятсизликлари учун жавобгарликни Ғарб елкасига ортишга уриниб, фронтдаги қийин вазиятни қурол-яроғнинг кечикиши билан изоҳлаган.
Изоҳ (0)