Бухоро ва Андижон вилоятларида кучли таъсир қилувчи дори воситаларини муомалага киритилишининг олди олинди, деб хабар беради Бош прокуратура ҳузуридаги департамент.
Қайд этилишича, департаментнинг Олот туман бўлими томонидан ИИБ ходимлари билан ҳамкорликда тезкор тадбир ўтказилган. Тадбирда фуқаро Х.О. ноқонуний даромад орттириш мақсадида жами 102 дона “Редуксин” номли кучли таъсир қилувчи дори воситасини фуқаро Х.Х.га сотаётган вақтида ашёвий далиллар билан ушланган.
Шу каби, департаментнинг Андижон шаҳар бўлими томонидан ИИБ ходимлари билан ҳамкорликда ўтказилган тезкор тадбирда фуқаро А.Р. ва бошқалар ноқонуний даромад орттириш мақсадида “Мустақиллик” МФЙ ҳудудида жами 75 дона “Тропикамид” ва “Pfizer” номли кучли таъсир қилувчи дори воситасини ўтказиш мақсадида олиб келаётгани аниқланиб, ашёвий далил сифатида олинган.
Мазкур ҳолатлар юзасидан Жиноят кодексининг 251-1-моддаси (кучли таъсир қилувчи ёки заҳарли моддаларни қонунга хилоф равишда муомалага киритиш) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Бектемир ва Қўқонда кучли таъсир қилувчи дори воситалари муомалага киритилишининг олди олингани тўғрисида хабар берилганди. Шунингдек, Ўзбекистоннинг икки ҳудудида кучли таъсир қилувчи дори воситаларининг яширин айланмасига чек қўйилган эди.
Изоҳ (0)