ҲАМАС гаровга олинганларнинг ҳаммасини озод қилмаса, Исроил ҳарбийлари 10 март куни Рафаҳга ҳужум уюштиради. Бу ҳақда Исроил ҳарбий вазирлар маҳкамаси вазири Бенни Ганцга таяниб, BBC хабар берди.
Исроил Ғазонинг жанубидаги 1,5 миллионга яқин фаластинлик бошпана топган шаҳарга ҳужум қилиш санасини илк бор очиқлади.
“Дунё ва ҲАМАС етакчилари билиши керакки, агар гаровга олинганлар рамазонгача уйларига қайтмасалар, жанглар ҳамма жойда, жумладан, Рафаҳ ҳудудида ҳам давом этади”, — дейди Ганц.
Исломнинг муқаддас рўза ойи бўлмиш рамазон жорий йилнинг 10 мартидан бошланиши кутилмоқда. Ганцнинг қўшимча қилишича, Исроил “тинч аҳоли орасида қурбонларни минималлаштириш учун америкалик ва мисрлик ҳамкорлар билан аҳолини эвакуация қилиш борасида мулоқот қилади”.
Аммо Исроил расмийлари эвакуация режаси ҳақида ҳозирча ҳеч қандай маълумот бермаган. Рафаҳдан олинган хабарларга кўра, рамазон бошланишига атиги уч ҳафта қолганида баъзи одамлар шаҳарни тарк этиб, ғарбга қирғоқ томон йўл олишмоқда, бироқ кўпчилик нима қилишни билмайди.
Халқаро босимга қарамай, Исроил бош вазири Биньямин Нетаньяху ҲАМАС жангчиларини йўқ қилиш учун Рафаҳга қуруқликдан ҳужум уюштиришга ваъда берган.
Миср ва бошқа баъзи араб давлатлари Исроилнинг Рафаҳга ҳужуми кўплаб фаластинликларни Мисрга қочишга мажбур қилиши мумкинлиги ҳақида бир неча бор огоҳлантирган. Қоҳира буни номақбул деб ҳисоблайди. Саудия Арабистони агар Рафаҳга ҳужум қилинса, “жуда жиддий оқибатларга юзлашишдан” огоҳлантирган.
Халқаро миқёсда Исроилни Рафаҳга ҳужум қилишдан тийилишга чақиришлар кўп бўлди.
- Уруш бошланганидан буён 28,4 мингдан ортиқ фаластинлик ҳалок бўлди, 68 мингдан зиёди яраланди. Охирги 24 соат ичида камида 127 фаластинлик ҳалок бўлган, 205 нафари яраланган.
- Ғазода давом этаётган жангларга қарамай, охирги кунларда Қоҳирада Исроил ва ҲАМАС ўртасида ўт очишни тўхтатишга воситачилик қилиш ҳаракатлари олиб борилмоқда, гарчи қатарлик воситачилар тараққиёт “жуда истиқболли” эмаслигини айтмоқда.
Изоҳ (0)