Ўзбекистонда зўравонлик кузатилган оилаларда ярашиш муддатисиз эр-хотинни ажратиш режалаштирилмоқда. Бу ҳақда Оила ва хотин-қизлар соҳаларидаги қонунчилик такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисидаги қонун лойиҳасида кўзда тутилган.
Президент 2023 йилнинг декабрида ҳукумат ва Олий судга оилавий зўравонлик қурбонларига нисбатан жабрланувчининг талабига кўра суд томонидан никоҳдан ажратиш тўғрисидаги ишларнинг соддалаштирилган тартибда ҳал қилиш қарорини чиқаришни назарда тутувчи қонун лойиҳасини ишлаб чиқиб, Қонунчилик палатасига киритишни топширганди.
Шунга кўра, Оила кодексида оилавий (маиший) зўравонлик қурбонларига нисбатан жабрланувчининг талабига кўра суд томонидан эр-хотиннинг биргаликда яшаш жойидаги хотин-қизлар фаолининг фикрини инобатга олган ҳолда уларнинг биргаликда яшашига имконияти мавжуд эмас деб топилса, ишнинг кўрилишини кейинга қолдирмасдан ярашиш учун мухлат тайинланмасдан қарор чиқариши мумкинлиги белгиланмоқда.
Шунингдек, суд тартибида у-жойга мажбурий тартибда киритишнинг механизмини соддалаштириш мақсадида Уй-жой кодексининг 32-моддаси қуйидаги қоидалар билан тўлдирилмоқда: “Уй-жойга мажбурий тартибда киритиш билан боғлиқ низоларни кўриб чиқишда мулкдорнинг ташаббусига асосан суд томонидан мажбурий тартибда киритиш, мутаносиб шароитга эга бошқа яшаш жойи билан таъминлаш ёки ижара ҳақини компенсация қилишга тарафларнинг келишувига асосан аниқ манзилни белгилаган ҳолда алмаштирилиши мумкин.”
Бундан ташқари, “Суд ҳужжатлари ва бошқа органлар ҳужжатларини ижро этиш тўғрисида”ги қонун 74-моддаси қуйидаги мазмундаги бешинчи қисм билан тўлдирилмоқда: “Суднинг қарорига кўра, ундирувчини кўчириб киритиш тўғрисидаги ижро ҳужжатининг ижро этилишига мулкдорнинг талабига кўра, унинг оила аъзолари, у билан доимий яшаётган фуқаролар ва собиқ оила аъзолари мулкдорга тегишли мутаносиб шароитга эга бошқа яшаш жойига ёки мулкдор томонидан ижара ҳақи тўлаб туриладиган яшаш жойи билан таъминлаш буйича зарур чораларни кўради.”
Ҳужжатда қайд этилишича, ушбу қонун оилавий мажбуриятларнинг бажарилишини таъминлаш, оилавий муносабатлар иштирокчиларининг ўз ҳуқуқларини ҳимоя қилиш, етказилган моддий ва маънавий зарарни қоплаш, никоҳ шартномаси ва фарзандликка олиш институтларини такомиллаштириш, боладан алоҳида яшаётган ота(она)ларнинг ота-оналик ҳуқуқини самарали амалга оширишга хизмат қилади.
Изоҳ (0)