Ўзбекистонда ҳафта давомида ҳарорат кўтарилиб боради

Ўзбекистонда кундуз кунлари ҳароратнинг жадал кўтарилиши бошланади ва иш ҳафтасининг охиригача давом этади, деб хабар бермоқда “Ўзгидромет”.

4—7 март кунлари Ўзбекистоннинг барча ҳудудлари бўйича ёғингарчиликсиз об-ҳаво бўлиши кутилмоқда. 8 мартда республика бўйича баъзи жойларда ёмғир ёғади.

4 март куни кундузи ҳаво ҳарорати 4-9 даража илиқ бўлади, сўнг ҳафта охиригача ҳарорат 13-18 даража илиққача аста-секин кўтарилади. Ҳарорат кечаси 2-5 даража совуқдан 2-5 даража илиққача кўтарилади.

Шамол асосан шарқий йўналишда бир оздан ўртачагача бўлган тезликда эсади, 8 мартда баъзи жойларда 15-18 метр/секундгача кучаяди.

5—6 март кунлари республиканинг айрим жойларига туман тушиши мумкин.

6—7 март кунлари айрим тоғли ҳудудларда, 8 мартда тоғли ҳудудларнинг катта қисмида ёмғир ва қор кўринишидаги ёғингарчилик бўлади. Қор кўчиш хавфи бор.

Тошкентда 4—7 март кунлари ёғингарчилик кутилмайди, 8 мартда бир оз ёмғир ёғиши мумкин. Ҳарорат кечалари 0-2 даража совуқдан 3-5 даража илиққача, кундуз кунлари 5-7 даража илиқдан 15-17 даража илиққача кўтарилади.

6—7 мартда кечаси ва эрталаб туман тушиши мумкин.