Ўзбекистондаги барча давлат идораларида энергия менежери — Energy Efficiency Manager лавозими жорий этилиши мумкин. Бу ҳақда Энергетика вазирлиги томонидан ишлаб чиқилган президент қарори лойиҳасида кўзда тутилган.
“Қайта тикланувчи энергия манбаларидан фойдаланишни янада жадаллаштириш ва республиканинг энергия самарадорлигини ошириш чора-тадбирлари тўғрисида” қарор лойиҳасига кўра, барча даражадаги давлат органлари ва ташкилотларида, 2025 йил 1 январдан бошлаб амалдаги раҳбар ўринбосарларидан бирига энергия самарадорлиги ва энергия тежамкорлиги бўйича вазифалар юклатилади ҳамда энергия менежери лавозими киритилади.
Раҳбарият учун энергия ресурсларини тежаш ва қайта тикланувчи энергия манбаларидан фойдаланишни жорий этиш бўйича асосий кўрсаткичлар (KPI) жорий этилади.
Бундан ташқари, Энергетика вазирлиги марказий аппаратида умумий штатлар сони доирасида барча ташкилот ва корхоналарда энергия ресурслари истеъмолининг таҳлилини ўтказиш билан шуғулланувчи таркибий бўлинма ҳамда Қорақалпоғистон Республикаси Энергетика вазирлиги, Энергетика вазирлигининг вилоятлар ва Тошкент шаҳар бошқармалари ташкил этилиши режалаштирилмоқда.
Ҳудудий бошқармаларнинг жами штатлар сони 70 тани ташкил этади ва улар маъмурий ислоҳотлар доирасида мақбуллаштириладиган штат бирликлари ҳисобидан шакллантирилади.
Ҳудудий бошқарма 1 нафар раҳбар, электр энергияси таъминоти бўйича 1 нафар мутахассис, табиий ва суюлтирилган газ таъминоти бўйича 1 нафар мутахассис, маҳаллий ва импорт кўмир таъминоти бўйича 1 нафар мутахассис ҳамда қайта тикланувчи энергия манбалари ва энергия самарадорлиги бўйича 1 нафар мутахассис ходимдан иборат бўлади.
Ҳудудий бошқармаларнинг фаолияти 2024 йилда Энергетика вазирлиги ҳузуридаги Ёқилғи-энергетика тармоғини ривожлантириш жамғармаси ҳисобидан, 2025 йилдан бюджет маблағлари ҳисобидан молиялаштирилади ва Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг мавжуд бино ва иншоотларида жойлаштирилади.
Изоҳ (0)