Россиялик марҳум мухолифатчи Алексей Навальнийнинг колониядаги ўлими бўйича тергов бир ой ичида якунланиши керак. Бу ҳақда Bellingcat интернет портали раҳбари, болгариялик тадқиқотчи журналист Христо Грозев 1 март куни “Dojd” телеканалида хабар берди.
Унинг сўзларига кўра, бу сафар Bellingcat билан бошқа кўплаб тадқиқотчи журналистлар ишламоқда.
Биз ҳақиқатни аниқ билиб оламиз ва бу аввалгидек узоқ давом этмайди, — дея ишонтирган Грозев.
У Россия махсус хизматлари тергов учун зарур бўлган маълумотларни йўқ қилишига йўл қўймаслик мақсадида тергов гуруҳи ҳозир текшираётган аниқ версияларни айтмаган, бироқ Навальний яна заҳарлангани сабаб вафот этганини истисно қилмаган.
Грозев, шунингдек, сиёсатчи вафот этган пайтда Россия Навальнийни собиқ чечен командирини ўлдирганликда айбланиб, Германияда умрбод қамоқ жазосини ўтаётган россиялик разведка ходими Вадим Красиковга алмаштириш бўйича АҚШ ва Германия ўртасида норасмий музокаралар олиб борганини тасдиқлаган. Грозевга кўра, Россия президенти бу таклифдан хабардор бўлган.
Изоҳ (0)