Стивен Спилберг “Шиндлер рўйхати”ни карьерасидаги энг яхши фильм деб атади

Режиссёр Стивен Спилберг Тhе Hollywood reporter нашрига берган интервьюсида ўзининг “Шиндлер рўйхати” (1993) драмаси энг яхши лойиҳаси эканлигини айтди.

“Ушбу фильмни режиссёрлик фаолиятимдаги энг яхши асар деб ҳисоблайман ва бундан фахрланаман” — дейди режиссёр.

1982 йилда ёзувчи ва сценарий муаллифи Томас Кенали “Шиндлер кемаси” романини чоп этади. Китобни кўриб чиққан Стивен Спилберг сюжетга қизиқиб қолади, шундан сўнг Universal Studios орқали китоб асосида фильм ишлаш ҳуқуқини қўлга киритади.

Фильм Иккинчи Жаҳон уруши пайтида 1100 дан ортиқ яҳудийларни қутқариб қолган нацистлар партияси аъзоси, тадбиркор Оскар Шиндлер ҳақидадир. Фильмда Лиам Нисон, Бен Кингсли, Рэйф Файнс ва бошқалар суратга тушган.

Асар 7 та “Оскар” мукофотини қўлга киритган ва 322 миллион доллар даромад келтирган.

Шунингдек, Стивен Спилберг фикрича, режиссёр Жонатан Глейзернинг “Қизиқишлар зонаси” фильми Холокост воқеаларини яхши ёритиб берган.