270 milliard dollarlik rag‘batlantirishga qaramay, Janubiy Koreyada tug‘ilish ko‘rsatkichi rekord darajaga tushib ketdi. Bu haqda The Guardian xabar berdi.
Janubiy Koreya aholisi ketma-ket to‘rtinchi yil qisqarmoqda, tug‘ilish va nikohlar soni ham kamaymoqda. Bir ayolga o‘rtacha farzand ko‘rish soni 0,72 ga tushib, dunyodagi eng past ko‘rsatkichga yetdi. 2023-yilda yangi tug‘ilgan chaqaloqlar soni 230 ming nafarni tashkil etgan, bu o‘tgan yilga nisbatan 19 ming nafarga kam.
Agar tug‘ilishning past ko‘rsatkichlari davom etsa, 2100-yilga kelib aholi soni deyarli ikki baravar kamayib, 26,8 millionga yetadi.
2006-yildan beri hukumat er-xotinlarni ko‘proq farzand ko‘rishini rag‘batlantirish dasturlariga 270 milliard dollardan ko‘proq mablag‘ sarfladi, naqd subsidiyalar, bola parvarishi xizmatlari va bepushtlikni davolash uchun yordam shular sirasiga kiradi.
Moliyaviy va boshqa rag‘batlar farzand tarbiyasida xarajat va mulk narxining keskin oshib borayotgani, yaxshi maoshli ish o‘rinlari yo‘qligi va mamlakatdagi ta’lim tizimi ko‘p bolali oila qurishga to‘siq bo‘layotganidan shikoyat qilayotgan er-xotinlarni rag‘batlantira olmadi. Nikoh farzand ko‘rishning zaruriy sharti sifatida ko‘riladi, ammo yashash qimmatligi tufayli nikohlar soni kamayib bormoqda.
So‘nggi ma’lumotlarga ko‘ra, Janubiy Koreyaning umumiy aholisi taxminan 51 milliondan oshadi. Shimoliy Koreyaniki esa 25 millionni tashkil qiladi. Bu raqamlar taxminiydir va tug‘ilish, o‘lim hamda migratsiya kabi omillar tufayli biroz o‘zgarishi mumkin.
Izoh (0)