Misrdan O‘zbekistonga gepatit C ga qarshi dori vositalarining 2024-yil hisobidan beshinchi partiyasi olib kelindi. Bu haqda “Dunyo” AA xabar qildi.
O‘zbekistonning Qohiradagi elchixonasi xabariga ko‘ra, Misr hukumati tomonidan 2025-yilga qadar umumiy qiymati 4,2 million dollar bo‘lgan jami 800 ming dona С gepatitiga qarshi “Daklatasvir” va “Sofosbuvir”, B gepatitiga qarshi “Entekavir” dori vositalarining beg‘araz yordam sifatida berilishi bo‘yicha kelishuvga erishilgan.
2023-yil davomida umumiy qiymati 696 ming dollarga teng bo‘lgan mazkur dori vositalari O‘zbekistonga bosqichma-bosqich yuborildi.
17-fevral kuni Misr hukumati tomonidan insonparvarlik yordami sifatida ajratilgan C gepatitiga qarshi “Sofosbuvir-400” dori vositalarining 2024-yildagi to‘rtinchi partiyasi yetkazib berildi. Umumiy 12 dona qutilarda 6720 dona ushbu dori vositalari Virusologiya ilmiy-tekshirish instituti tomonidan bemorlarga taqsimlanadi.
Mutaxassislar hisob-kitobiga ko‘ra, bir nafar bemorning 3 oylik to‘liq davolash kursi uchun 3 qadoq “Daklatasvir” va 3 qadoq “Sofosbuvir” kerak bo‘ladi. Mazkur davolash kursining Misrdagi o‘rtacha narxi 31 dollar bo‘lsa, O‘zbekistonda joriy yilga qadar 100 dollarga baholanib kelingan.
Misr hukumati taqdim etadigan 800 ming dona dori vositasi jami 133 ming bemorga yetadi. Ya’ni, agarda gepatit C ga qarshi dori vositalari shu paytgacha xorijdan xarid qilinayotgan baholarda sotib olinganda O‘zbekiston davlat byudjetidan 13,3 million dollar sarflangan bo‘lardi. Davlat byudjetidan iqtisod qilingan mablag‘lar gepatitni aniqlash bo‘yicha aholini skrining qilish hajmini joriy 10 mingdan 1 millionga qadar oshirish, viruslarni aniqlab, kasallikka to‘liq barham berishga imkon yaratishi kutilmoqda.
Izoh (0)