НАТОнинг ҳарбий штаб бошлиғи ёрдамчиси Гуннар Брюгнер баёнот бериб, блокнинг Steadfast Defender 2024 машқлари Россияга қарши урушга тайёргарлик кўриш мақсадида ўтказилмаётганини айтди.
Унинг сўзларига кўра, ҳарбий машғулотлар эҳтимолий можаронинг олдини олиш учун сигнал беради.
“Биз ҳеч кимга қарши урушга тайёргарлик кўрмаяпмиз. Биз юзага келиши мумкин бўлган шароитларга тайёргарлик кўрмоқдамиз... Ҳар бир кема, самолёт, танк ва аскар тийиб туриш учун сигнал вазифасини бажаради”, — деди Брюгнер Financial Times газетасига.
У, шунингдек, НАТО ташкилотида Ғарб давлатлари кўпроқ машқ қилиши керак, деган фикр оммалашганини қўшимча қилди.
Steadfast Defender машқлари 2024 31 январда бошланган бўлиб, 31 майгача давом этади. Financial Times нашрида келтирилишича, уларда 90 мингдан ортиқ ҳарбий хизматчилар, шунингдек 1,1 минг транспорт воситалари, 50 та кема ва 80 та самолёт иштирок этмоқда.
НАТОнинг ҳарбий қўмитаси раҳбари Роб Bauer октябрда айтганидек, иттифоқ “Россиянинг шарқий ҳудудга эҳтимолий бостириб киришига” қарши жавоб ҳаракатларни машқ қилади.
Кремль машқларни Россия учун таҳдид деб атади. Россия ғарб сиёсатчиларининг НАТО билан эҳтимолий тўқнашув ҳақидаги баёнотларини иқтисодий муаммолардан диққатни чалғитишга уриниш деб ҳисобламоқда.
Изоҳ (0)