“Бундай рақамлар яқин тарихимизда ҳеч қачон бўлмаган”. Президент пахта ва ғалла ҳосили ҳақида гапирди

Шавкат Мирзиёев раислигида аграр соҳадаги устувор вазифа ва режаларга бағишланган йиғилиш бошланди. Бу ҳақда президент матбуот котиби хабар берди.

Соҳада сўнгги йилларда амалга оширилган ислоҳотлар натижасида деҳқон-фермерларнинг манфаати, даромади ошиб, маҳсулот кўпайди, кластер тизими ривожланиб, юқори унумли техника ва чуқур қайта ишлаш кириб келди, янги навлар ва агротехнология кўпаймоқда.

Жумладан, 2023 йили соҳада ишлаб чиқариш 4,1 фоизга ўсиб, 426 триллион сўмни ташкил қилди. Экспорт эса қарийб 2 миллиард долларга етди. 152 минг гектар боғ ва токзорлар барпо қилинди.

Бу йил илк бор 3 миллион 700 минг тонна пахта, 8 миллион тонна ғалла ҳосили олинди. “Бундай рақамлар яқин тарихимизда ҳеч қачон бўлмаган”, — дейилади хабарда.

Эслатиб ўтамиз, февраль бошларида Шавкат Мирзиёев мева-сабзавотчилик ва озиқ-овқат тармоғини ривожлантириш масалалари бўйича йиғилиш ўтказиб, қишлоқ хўжалиги маҳсулотлари экспорти 3,5 млрд долларга етказилиши айтилган эди.