Украинада ҳарбий ёшдаги қарийб 3,4 миллион эркак Қуролли кучлар сафига сафарбар қилинишидан қўрқиб, ҳукуматдан яшириниб юрибди, деди Олий Раданинг Иқтисодий ривожланиш қўмитаси раиси Дмитрий Наталуха.
“Бугунги кунда камида 3,4 миллион эркак бор, улар ҳақида давлат фақат идентификация рақамини билади. Улар хорижда эмас, Украина Қуролли кучларида эмас, ногирон ҳам эмас, ўқимайди ва ишламаяпти”, — дейди у.
Наталуханинг сўзларига кўра, ҳукумат бу одамларнинг қаердалигини билмайди, лекин улар иқтисодий жараёнларда иштирок этади. Шу билан бирга, бу одамлар “ҳарбий рўйхатга олиш ва чақирув бошқармаси эътиборига тушмаслик учун давлат банкларидан фойдаланишни, нақд пул олишни, кредит карталаридан фойдаланишни, шаҳарлар ўртасида саёҳат қилишни тўхтатган бўлиши мумкин”.
Украинада 2022 йил 24 февралдан бошлаб ҳарбий ҳолат режими жорий этилди, эртаси куни Владимир Зеленский умумий сафарбарлик тўғрисидаги фармонни имзолади. Ҳарбий ҳолат даврида 18 ёшдан 60 ёшгача бўлган эркакларнинг Украинадан чиқиб кетиши тақиқланади.
Чақирув варақаси турли жойларда топширилиши мумкин. Бундай ҳолат кўчаларда, ёқилғи қуйиш шохобчаларида ва кафеларда амалга оширилгани ҳақида турли видеолар пайдо бўлди.
Чақирувни сафарбарликка жалб қилинган эркак ишлайдиган корхона раҳбарлари, уй-жой идораси бошлиқлари ва бошқа мансабдор шахслар ҳам амалга ошириши мумкин.
Изоҳ (0)