Юлдуз Усмонова қайғули ўтмиши, “наркоман” артистлар ва 15 минг еврога тўйга борган пайтлари ҳақида гапирди

Ўзбекистон халқ артисти Юлдуз Усмонова ҳуқуқшунос ва актёр Отабек Маҳкамовга берган интервьюсида хорижий тилларни ўрганишнинг аҳамияти ҳамда чет давлатларда яшаган даврлари ҳақида сўзлаб берди.

— Голландияда яшаган вақтимда инглиз тилини ўрганганман. Чунки ўшанда умуман тил билмасдим. Жуда кўп ҳужжатларга тушунмай имзо қўйганман. Кейин билсам, у қўшиқларимнинг муаллифлик ҳуқуқи ҳақида экан. Жуда кўп қўшиқларим Голландиядан Туркияга сотилди шунинг орқасидан. Мен ҳужжатга тушунмай қўл қўйганим учун ҳаққимни талаб қила олмадим. Ўзбекистонда вазият оғир бўлгани учун бу ерга ҳам қайта олмасдим. Шу вазият сабаб бўлиб инглиз тилини ўрганганман, — дейди Юлдуз Усмонова. 

Шунингдек, Ўзбекистон халқ артисти ёшлар нечта тилни билиши кераклиги ҳақида ҳам гапирди. 

— Тилни яхши билмаганим учун ўзимнинг зараримга ишлайдиган ҳужжат имзолаб қўйганман. Ўзбекистонда ўзбек тилида гаплашишимиз керак, лекин бу биз бошқа тилларни ўрганмаслигимиз керак, дегани эмас. Мен ўшанда Голландияда озгина яшаб, Ўзбекистонга келганимдан кейин менга давлат томонидан яшашга рухсатнома беришган. Менежерим у ҳужжатни менга кейин кўрсатган. Кейин мен шунча концертларни ташлаб келганим учун 100 минг евродан кўпроқ жарима тўлаганман. Нима демоқчиман, тил билиш шарт. Рус тили, инглиз тили, турк тилини билиш шарт. Ўзбек тили она тилимиз. Ҳозир ҳамма ёшлар шу тўртта тилни билишлари шарт. Невараларим билан ҳар замонда инглизча гаплашиб қоламан. Улар бир нечта тилни яхши билишади, — дейди санъаткор. 

Юлдуз Усмонова мусофирлик дамлари ҳақида гапириб, Туркияда қийин кунларни бошдан кечирганини айтиб ўтди.  

— Турк миллатини яхши тушуниш учун тилини ўргандим. Уларнинг фикрлашини, мантиғини ўрганганман. Эр-хотин ўша ерда мусофирчиликни кўрдик, қийинчилик кўрдик. Ўзимни тўйга уриб юбормадим. Ишладим, бир-икки сўм топсак, альбомга, ижодимга тикдим. Ўшанда Ўзбекистонга тўйларга келишимни 15 минг евро қилиб қўйганман. Ризқимни Аллоҳ етказди. Ўзимизнинг тўйларга чет эллик хонандалардек келиб-кетардим. Туркияда секин-аста ижод қилиб, концерт қилиш пайида юрдим. Турклар чипта сотиб олиб, хонанданинг концертига кирмайди. Бунақа маданият ўлиб кетган уларда. Туркияда концертларни ҳокимият уюштириб, хонанданинг гонорарини продюсерга беришади. Мен продюсернинг қўғирчоғи бўлиб қолишни истамадим, бу нарса менга ёқмади.