Дори-дармон воситалари ҳамда тиббиёт буюмларини реализация қилишда назорат механизмларига шаффоф тизим йўлга қўйилмаган. Бу ҳақда Олий Мажлис Сенатининг Фан, таълим ва соғлиқни сақлаш масалалари қўмитаси мажлисида маълум қилинди.
Анжуманда таъкидланишича, Президент фармони билан тасдиқланган 2022–2026 йилларда фармацевтика тармоғини янада ривожлантириш бўйича “Йўл харитаси”да белгиланган айрим вазифалар бажарилмаган:
- Постмаркетинг назоратини амалиётга жорий этиш бўйича “Дори воситаларининг постмаркетинг назоратини амалга ошириш қоидалари” ишлаб чиқилмаган ва тасдиқланмаган.
- Дори воситаларининг ножўя таъсирлари бўйича олинган маълумотларни мунтазам равишда “Фармакологик назорат” миллий электрон ахборот тизимига киритиш йўли билан “Фармакологик назорат” миллий электрон ахборот базаси яратилмаган.
- Аутсорсинг қилувчи ташкилотларнинг буюртмаси асосида маҳаллий ишлаб чиқарувчи ташкилотлар қувватларида фармацевтика маҳсулотларини ишлаб чиқариш ҳамда ишлаб чиқариладиган фармацевтика маҳсулотларини давлат рўйхатидан ўтказишнинг самарали механизми жорий этиш бўйича ҳукумат қарори лойиҳаси ишлаб чиқилмаган).
- Соғлиқни сақлаш вазирлиги ҳузуридаги Фармацевтика тармоғини ривожлантириш агентлигининг “Дори воситалари, тиббий буюмлар ва тиббий техника экспертизаси ва стандартлаштириш давлат маркази” ДУК таркибидаги Фармакопея қўмитасини Фармацевтика тармоғини ривожлантириш агентлигининг “Фармакопея маркази” давлат унитар корхонаси шаклида қайта ташкил этиш бўйича ҳукумат қарори лойиҳаси ишлаб чиқиш якунига етказилмаган.
Қўшимча қилинишича, Соғлиқни сақлаш вазирлигининг “Асосий дори воситалари рўйхатини тасдиқлаш тўғрисида”ги буйруғи билан тасдиқланган дорилар рўйхати, тасдиқланган клиник баённомалар, тавсиялар ва даволаш стандартларидаги тақдим этилган дори воситаларига мос келмайди.
Изоҳ (0)