Россия президенти Владимир Путиннинг Карелиядаги “махфий қароргоҳи” тобора кўпроқ қўриқланадиган ерларни эгаллаб бормоқда ва унинг ҳудуди аллақачон Монакодан икки баравар кўп. “Досье” марказининг суриштирув олиб борувчи журналистлари ўзининг навбатдаги суриштирувини эълон қилди.
Журналистларга кўра, Карелиядаги “махфий дача” Финляндия билан чегарадан тахминан 30 километр узоқликда, Ладога кўлининг Маржалаҳти кўрфази қирғоғида жойлашган. 2010 йилларнинг бошларида ушбу ҳудуд маҳаллий сайёҳлик базаси эгаларига тегишли эди, улар “Досье” марказининг таъкидлашича, “анъанавий тарзда — прокуратура ташрифлари ёрдамида йўқ қилинган”.
Шундан сўнг ерга Россия президентининг яқин дўсти Юрий Ковалчукнинг компаниялари эгалик қилган. Турбаза ҳудудига миллий қўриқхона ерлари қўшиб олинган ва бегона кўзлардан ёпилган — у Федерал қўриқлаш хизмати томонидан ҳимояланган. Расмий равишда резиденсия майдони тахминан бир квадрат километрни ташкил қилади.
“Аммо атрофдаги ўрмонлар ва кўрфазга шунчаки кириб бўлмаслигини ҳисобга олсак, ҳосил бўлган майдон тахминан тўрт квадрат километрни ташкил этади, бу Монакодан икки баравар каттадир”, — дейилади “Досье” ҳисоботида.
Ҳозир турбаза ҳудудида замонавий услубдаги учта қаср бор, улар ҳужжатларга кўра “балиқчи кулбаси”, “омбор” ва “боғли уй” деб номланади. Шунингдек, сувда ҳаммом, форел етиштириладиган хўжалик, мармар мол гўшти ишлаб чиқариш учун сигирлари бўлган ферма, иккита вертолёт майдончаси, яхталар учун пирс, шунингдек, шаршара, унинг қаршисида шахсий суҳбатлашиш учун ўриндиқлар мавжуд.
Бир неча йил олдин, “омбор” орқасида тепалик пайдо бўлди. Журналистларнинг тахмин қилишича, бу ерда Россия президентини эҳтимолий ҳужумлардан ҳимоя қилиш учун “Панцир” ҳаво мудофаа тизими жойлаштирилмоқда. Маржалаҳти ҳудудида “Алгода” ва “Нега” яхталари мунтазам равишда қайд этилади.
2020 йилдан бери Путиннинг “махфий қароргоҳи”дан тўрт километр узоқликда яна бир сарой, шунингдек, ҳаммом, ресторан, вертолёт майдончаси ва пирс (гидротехник иншоот) қурилган. Ушбу мажмуанинг эгаси тадбиркор Роман Абрамович, дейди “Досье” маркази.
Президентнинг Карелиядаги расмий қароргоҳи Укшозеро қирғоғидаги Шуйская Чупа қишлоғида жойлашган эди. 2011 йилда қароргоҳ очиқ ким ошди савдосида Алексей Мордашовнинг “Северстал” холдингига сотилган.
Изоҳ (0)