“Ташаббусли бюджет” жараёнининг 2024 йилги илк мавсумига 1 февралдан старт берилади. Бу ҳақда Иқтисодиёт ва молия вазирлиги матбуот хизмати хабар берди.
Бунда лойиҳаларни киритиш 1−20 февраль кунлари амалга оширилади. Ундан кейин, 21 февралдан 11 мартгача лойиҳаларни саралаш ўтказилади. Овоз бериш жараёни эса 12−31 март саналари давомида ўтказилади.
“Мазкур мавсум учун туман ва шаҳар бюджетлари ҳисобидан 3 триллион сўмдан ортиқ маблағ йўналтирилади. Жорий йилда лойиҳаларнинг энг юқори қиймати 1,36 миллиард сўмни ташкил этади”, — дейилади хабарда.
2021—2023 йиллар давомида “Ташаббусли бюджет” жараёнлари учун давлат бюджетидан қарийб 8 триллион сўм маблағлар йўналтирилди. Мазкур маблағлар доирасида жами ўн минга яқин лойиҳалар ғолиб деб топилиб, беш мингдан ортиқ маҳаллаларда ижтимоий муаммолар бартараф этилишига эришилди.
Иқтисодиёт ва молия вазирлиги томонидан эълон қилинган 2024—2026 йиллар учун Бюджетномада “Ташаббусли бюджет”да 1,5 мингдан ортиқ овоз тўплаган, лекин ғолиб деб топилмаган лойиҳалар таҳлиллари асосида маблағ ажратиш режалаштирилаётгани тўғрисида хабар берилганди.
Изоҳ (0)