Иқтисодий тадқиқотлар ва ислоҳотлар маркази Ўзбекистоннинг 2023 йилдаги Хитой билан савдосини таҳлил қилди.
Марказ таҳлилига кўра, ўтган йили Ўзбекистоннинг Хитой билан товар айирбошлаш ҳажми 51,5 фоизга ўсиб, 13,7 миллиард долларни ташкил этди. Бунда экспорт ҳажми 2,5 миллиард доллар, импорт 11,3 миллиард долларга етган. Марказ Хитойдан импорт улуши қарийб 75,2 фоизга ўсганини қайд этган.
“2023 йилда Хитойдан импортнинг асосини машина ва ускуналар, саноат товарлари ва кимёвий моддалар ташкил қилди”, — дея қайд этган марказ.
Умуман олганда, 2023 йил якунлари бўйича Ўзбекистоннинг умумий ташқи савдо айланмасида Хитойнинг улуши 21,9 фоизни ташкил этган. Шундан жами экспортнинг 10,1 фоизи, импортнинг 29,5 фоизи Хитой ҳиссасига тўғри келган.
Статистика агентлиги ҳисоботида икки давлатнинг 2022 йилдаги товар айланмаси ҳажми 9 миллиард долларни ташкил этгани келтирилган. Бунда Ўзбекистоннинг экспорт улуши 2,6 миллиард доллар, импорти эса 6,4 миллиард доллар бўлган.
Марказнинг эслатишича, 2023 йилнинг 17 октябрь куни “Бир камар, бир йўл” ташаббусининг 10 йиллиги муносабати билан бўлиб ўтган музокаралар чоғида Ўзбекистон ва Хитой раҳбарлари яқин 5 йилда товар айирбошлаш ҳажмини 20 миллиард долларга етказиш учун барча асослар мавжудлигини таъкидлашган.
“Хитой компаниялари ва молия институтлари иштирокида юқори технологиялар, муқобил энергетика, кимё, машинасозлик, металлургия, электротехника, инфратузилмани модернизация қилиш ва бошқа соҳаларда қатор йирик сармоявий лойиҳалар амалга оширилмоқда”, — дея қўшимча қилган Иқтисодий тадқиқотлар ва ислоҳотлар маркази.
Маълумот учун, жорий йилнинг 23 январь куни президент Шавкат Мирзиёев Си Цзиньпин таклифига биноан давлат ташрифи билан Хитойга жўнаб кетди. Ташриф доирасида олий даражадаги музокаралар ва қатор икки томонлама учрашувлар ўтказилиши кўзда тутилган. Кун тартибидан Ўзбекистон билан Хитой ўртасидаги ҳар томонлама стратегик шериклик муносабатларини янада мустаҳкамлаш ва кенг кўламли амалий ҳамкорликни кенгайтириш масалалари ўрин олган. Шунингдек, давлат раҳбари Хитой ҳудудларидан бирига ташриф буюриб, ушбу мамлакат етакчи компаниялари ва банк-молия институтлари раҳбарлари билан учрашув ўтказади.
Изоҳ (0)