Дунёдаги энг йирик рақамлашган иншоотлар қурувчиси Populous компанияси чўққи устида инновацион стадион қурилиш режасини ошкор қилди. У катта LED дисплейи эгилувчан дизайнга эга бўлади.
Шаҳзода Муҳаммад бин Салмон стадиони ердан 200 метр баландликдаги тоғ чўққисида қурилиши режалаштирилмоқда. Стадион Саудия Арабистони пойтахти Ар-Риёддан транспортда тахминан 40 дақиқалик масофада жойлашади.
Стадионнинг умумий сиғими 45 минг ўринни ташкил қилади. Арена футбол, бокс, киберспорт, концертлар ва театр томошаларига мезбонлик қилади, шунингдек, Саудия Арабистони Профессионал футбол лигаси иштирокчилари “Ал-Ҳилол” ва “Ал-Наср” футбол клубларининг уй майдони бўлади. Балки 2034 йилда Саудия Арабистони мезбонлик қиладиган футбол бўйича жаҳон чемпионати ўйинлари ҳам шу ерда ўтказилар.
Populous’нинг таъкидлашича, бу дунёдаги биринчи интеграциялашган том қисми тўлиқ йиғиладиган, қиядаги майдон ва LED деворларга эга арена ҳисобланади. LED деворларда ўйинлар жонли намойиш қилинади. Фойдаланилмаётган вақтда стадионда Қиддия шаҳрининг ажойиб манзараларининг намойиши бўлади.
Шубҳасиз, Саудия Арабистонининг чўл ҳудудида концертлар, футбол ўйинлари ва бошқа тадбирларни ўтказиш томошабинлар учун қулайлик нуқтайи назаридан жиддий муаммоларни келтириб чиқаради. Шуларни инобатга олган Populous компанияси бевосита стадионинг пастки қисмида сунъий кўл қуришни режалаштирган.
Стадион қачон қуриб битказилиши ҳақида ҳозирча маълумотлар йўқ.
Бу Саудия Арабистонидаги яна бир шов-шувли архитектуранинг намунасидир. Мамлакат етакчилари нефтга асосланган иқтисодиётдан туризмга асосланган иқтисодиётга ўтишга интилмоқда.
Изоҳ (0)