Дональд Трамп Айовa штатидаги республикачилар кокуси иштирокчиларининг аксарияти томонидан қўллаб-қувватланди. Бу ҳақда New York Times AP агентлигига таяниб хабар берди. Агентлик таҳлилчилари биринчи сайлов участкаларида овоз бериш натижалари эълон қилингандан сўнг дарҳол собиқ президентнинг ғалабасини муқаррар деб ҳисоблашган.
104 минг овоз санаб чиқилганидан кейин Трамп 50,9 фоиз овоз тўплагани маълум бўлди. У штатнинг 99 округидан 98 тасида етакчилик қилмоқда. Флорида губернатори Рон ДеСантис иккинчи ўринда, уни штат республикачиларининг 21,3 фоизи қўллаб-қувватлади. АҚШнинг БМТдаги собиқ элчиси Никки Хейли 19,1 фоиз овоз билан учинчи ўринда. Тўртинчи ўринни эгаллаган бизнесмен Вивек Рамасвами ўз сайловолди ташвиқотини якунлаганини эълон қилди.
NYT ҳисоб-китобларига кўра, овозларнинг 94 фоизи ҳисоблаб чиқилган.
Айовa штатидаги кокуслар анъанавий равишда Қўшма Штатлардаги Республикачилар партияси учун партия ичидаги сайловларнинг биринчи босқичи ҳисобланади. Кейинги навбатда Нью-Хемпширда 23 январь куни бўлиб ўтадиган праймериз бор. Республикачилардан номзод баҳор охиригача аниқланади ва партиянинг июлдаги қурултойида расман кўрсатилади.
Изоҳ (0)