ФВВ Россиядаги автоҳалокатда ҳалок бўлган ва жабрланганлар ҳақида маълумот берди

Россиянинг Самара вилояти Ставропол районида 16 январь куни ўзбекистонликлар бўлган машина йўл-транспорт ҳодисасига учрагани хабар қилинганди. ФВВ ҳалок бўлган ва жабрланганлар ҳақида маълумот берди.

Келтирилишича, 16 январь куни Россия Фавқулодда вазиятлар вазирлиги навбатчилик қисмидан олинган маълумотга кўра, жорий йилнинг 16 январь куни (Москва вақти билан) соат 13:00 ларда Самара вилояти, Ставрополск райони М-5 автомобиль йўлининг 947 километрида ҳаракатланган Lada Largus русумли  автомобиль ва “Газел” русумли юк автомобили тўқнашиши оқибатида Lada Largus’да бўлган жами 7 нафар Ўзбекистон фуқароларидан 3 нафари воқеа жойида вафот этган, 4 нафар йўловчи турли даражада тан жароҳати олиб, шифохонага ётқизилган ва тиббий муолажалар кўрсатилмоқда.

Айни вақтда Фавқулодда вазиятлар, Ташқи ишлар, Ички ишлар, Соғлиқни сақлаш ва Транспорт вазирликлари, Ташқи меҳнат миграцияси агентлиги ва бошқа тегишли ташкилотлар билан ҳамкорликда вафот этган ва жабрланган фуқароларни ватанга олиб келиш юзасидан керакли барча зарур чоралар кўрилмоқда.

Россия масъуллари юзага келган мазкур бахтсиз ҳодиса оқибатларини зудлик билан бартараф этиш, жароҳатланганларга тез тиббий ёрдам кўрсатишда яқиндан кўмак бермоқда. Ўзбекистон Фавқулодда вазиятлар вазирлиги Россиянинг тегишли ташкилотлари билан бу борада яқиндан ҳамкорлик ишларини олиб бормоқда.