Ўзбекистоннинг Владивосток шаҳридаги Бош консуллиги дипломатлари кўмагида мазкур ҳудудда вақтинча ишлаётган фуқаро А.Т. ва унинг вояга етмаган қизи М.Ғ.нинг ватанга қайтиши таъминланди. Бу ҳақда “Дунё” агентлиги хабар берди.
Бош консулхонага йўлланган мурожаатга кўра, Самарқанд вилоятида туғилган А.Т. 2021 йил 12 октябрь куни туғилган қизи М.Ғ. билан бирга 2022 йилда Россиянинг Приморск ўлкасига вақтинча ишлаш учун келган. 2023 йил 22 декабрь куни унинг Владивосток шаҳридаги вақтинча турар жойида Приморск ўлкаси Вояга етмаганлар билан ишлаш бошқармаси ва маҳаллий полиция ходимлари томонидан текширув ўтказилган. Натижада, А.Т.нинг Россия ҳудудида ноқонуний равишда бўлиб тургани аниқланган. Ҳолат бўйича тегишли тартибда баённома расмийлаштирилган ва фуқаронинг вояга етмаган фарзанди Владивосток шаҳридаги “Краевой психоневрологический дом ребёнка” марказига жойлаштирилган.
Бош консулхона ходимлари мурожаат асосида Приморск ўлкаси Вояга етмаганлар билан ишлаш бошқармаси вакиллари билан музокара ўтказган. Натижада, М.Ғ. онасига қайтарилган. Шунингдек, ушбу оиланинг молиявий аҳволи инобатга олиб, А.Т. ва унинг вояга етмаган фарзанди М.Ғ.га Ўзбекистонга қайтиш учун чипта сотиб олиб берилган.
Ўзбекистон фуқаролари шу йил 7 январь куни Uzbekistan Airways компаниясининг Владивосток—Тошкент йўналиши бўйича учган самолётда ватанга кузатиб қўйилган.
Бундан олдин Россияга ишлаш учун бориб, вафот этган аёлнинг 9 ёшли қизи Ўзбекистонга қайтарилгани тўғрисида хабар берилганди. Шунингдек, Мисрда автоҳалокатга учраб, оғир тан жароҳати олган ўзбекистонлик аёл ватанга қайтарилган, Россияда эри қамалиб, чақалоғи билан қийин аҳволда қолган аёлга ёрдам кўрсатилган эди.
Изоҳ (0)