Жорий йилнинг 12 январь куни Ўзсаноатқурилишбанк ҳамда Тошкент шаҳридаги Сингапур менежментни ривожлантириш институти ўртасида таълим ва тажриба алмашиш соҳасидаги ҳамкорликка қаратилган меморандум имзоланди. Ҳужжат билан Ўзсаноатқурилишбанк ходимларини қайта тайёрлаш ва малакасини ошириш ҳамда хорижий давлатларда амалиёт ўташини ташкил этишга келишилди.
Президентимиз томонидан тасдиқланган 2022—2026 йилларга мўлжалланган Янги Ўзбекистоннинг тараққиёт стратегияси ҳамда 2020—2025 йилларга мўлжалланган Ўзбекистон Республикасининг банк тизимини ислоҳ қилиш стратегиясида кадрларни танлаш, улар малакасини узлуксиз ошириш ҳамда талаб юқори бўлган йўналишларда мутахассисларни тайёрлаш ва қайта тайёрлашга қаратилган вазифалар белгиланган.
Шунингдек, давлатимиз раҳбари бошчилигида таълимга оид олиб борилаётган ислоҳотларда, айниқса, илғор хорижий тажрибаларни жорий қилган ҳолда замонавий таълим дастурларини ишлаб чиқиш ва юқори малакали профессионал кадрлар тайёрлашни янги босқичга кўтаришга катта эътибор қаратилмоқда.
Ўзсаноатқурилишбанк томонидан ушбу вазифалар ижроси доирасида Халқаро молия корпорацияси, Осиё тараққиёт банки ҳамда Европа тикланиш ва тараққиёт банки кўмагида қатор ишлар амалга оширилди. Мижозларга хизмат кўрсатувчи ходимлар учун халқаро стандартлар ишлаб чиқилди, халқаро таълим дастурлари доирасида ўқув курслари ташкил этилди, кадрларни рағбатлантиришнинг KPI тизими йўлга қўйилди, Сколково Москва бошқарув мактаби билан ҳамкорликда ўқитиш ишлари олиб борилди.
– Трансформация – бу янги иш муҳити, янгича ишлаш услубидир, – дейди “Ўзсаноатқурилишбанк” АТБ бошқарув раиси Азиз Акбаржонов. – Бугунги кунгача биз кадрлар сиёсатини тизимдаги трансформацияга мос равишда такомиллаштириб, мана шундай ишлаш принципига замин яратдик. Эндиликдаги саъй-ҳаракатларимизда эса, хорижий етакчи банклар фаолиятига нисбатан рақобатбардош бўлиш мақсади кўзланган.
Банкнинг таълим ва тажриба алмашиш соҳасида олий таълим муассасасини жалб қилиши Ўзбекистон банк тизимида биринчи марта қўлланилаётгани билан аҳамиятлидир.
– Тошкент шаҳридаги Сингапур менежментни ривожлантириш институтини танлов қилганимиз бежиз эмас, – дейди “Ўзсаноатқурилишбанк” АТБ Ходимлар ва ташкилий ривожлантириш департаменти директори в.в.б Абдулазиз Орифжонов. – Олийгоҳ ташкил этилганидан буён банк-молия ва бошқарув йўналишларида дунёнинг нуфузли олий ўқув юртлари билан ҳамкорликда турли таълим дастурларини илгари суриб келмоқда. Бундан ташқари, институтда банк ва бизнес бошқарувига оид чуқур тадқиқотлар ўтказилмоқда, юзлаб ёшлар етакчи давлатларда амалиёт ўтаб, замонавий билим ва кўникмалар орттирмоқда. Бу борада институт тўплаган тажриба биз билан ҳамкорликда ҳам юқори натижа беришига умид қилаяпмиз.
Мазкур қўшма таълим дастурига кўра, Ўзсаноатқурилишбанк ходимлари риск-менежмент, комплаенс-назорати, аудит, бизнес таҳлил, лойиҳаларни бошқариш каби соҳанинг муҳим йўналишлари бўйича қайта тайёрланиб, малакаси оширилади. Англия, Германия, Сингапур, Корея ва Швейцариядаги етакчи ўқув марказларида амалиёт ўташ имкониятига эга бўлади.
Жорий йил давомида дастур доирасида Бош банк, фронт ва бек-офис ходимлари ҳамда топ-менежерлардан иборат 3,5 мингдан зиёд кадрлар ўқитилиб, уларнинг ФРМ, ЧФА, АЧЧА, ПМИ каби халқаро сертификатларни олишига кўмаклашиш режалаштирилган.
Реклама ҳуқуқи асосида.
Изоҳ (0)