Joriy yilning 12-yanvar kuni O‘zsanoatqurilishbank hamda Toshkent shahridagi Singapur menejmentni rivojlantirish instituti o‘rtasida taʼlim va tajriba almashish sohasidagi hamkorlikka qaratilgan memorandum imzolandi. Hujjat bilan O‘zsanoatqurilishbank xodimlarini qayta tayyorlash va malakasini oshirish hamda xorijiy davlatlarda amaliyot o‘tashini tashkil etishga kelishildi.
Prezidentimiz tomonidan tasdiqlangan 2022—2026-yillarga mo‘ljallangan Yangi O‘zbekistonning taraqqiyot strategiyasi hamda 2020—2025-yillarga mo‘ljallangan O‘zbekiston Respublikasining bank tizimini isloh qilish strategiyasida kadrlarni tanlash, ular malakasini uzluksiz oshirish hamda talab yuqori bo‘lgan yo‘nalishlarda mutaxassislarni tayyorlash va qayta tayyorlashga qaratilgan vazifalar belgilangan.
Shuningdek, davlatimiz rahbari boshchiligida taʼlimga oid olib borilayotgan islohotlarda, ayniqsa, ilg‘or xorijiy tajribalarni joriy qilgan holda zamonaviy taʼlim dasturlarini ishlab chiqish va yuqori malakali professional kadrlar tayyorlashni yangi bosqichga ko‘tarishga katta eʼtibor qaratilmoqda.
O‘zsanoatqurilishbank tomonidan ushbu vazifalar ijrosi doirasida Xalqaro moliya korporatsiyasi, Osiyo taraqqiyot banki hamda Yevropa tiklanish va taraqqiyot banki ko‘magida qator ishlar amalga oshirildi. Mijozlarga xizmat ko‘rsatuvchi xodimlar uchun xalqaro standartlar ishlab chiqildi, xalqaro taʼlim dasturlari doirasida o‘quv kurslari tashkil etildi, kadrlarni rag‘batlantirishning KPI tizimi yo‘lga qo‘yildi, Skolkovo Moskva boshqaruv maktabi bilan hamkorlikda o‘qitish ishlari olib borildi.
– Transformatsiya – bu yangi ish muhiti, yangicha ishlash uslubidir, – deydi “O‘zsanoatqurilishbank” ATB boshqaruv raisi Aziz Akbarjonov. – Bugungi kungacha biz kadrlar siyosatini tizimdagi transformatsiyaga mos ravishda takomillashtirib, mana shunday ishlash prinsipiga zamin yaratdik. Endilikdagi saʼy-harakatlarimizda esa, xorijiy yetakchi banklar faoliyatiga nisbatan raqobatbardosh bo‘lish maqsadi ko‘zlangan.
Bankning taʼlim va tajriba almashish sohasida oliy taʼlim muassasasini jalb qilishi O‘zbekiston bank tizimida birinchi marta qo‘llanilayotgani bilan ahamiyatlidir.
– Toshkent shahridagi Singapur menejmentni rivojlantirish institutini tanlov qilganimiz bejiz emas, – deydi “O‘zsanoatqurilishbank” ATB Xodimlar va tashkiliy rivojlantirish departamenti direktori v.v.b Abdulaziz Orifjonov. – Oliygoh tashkil etilganidan buyon bank-moliya va boshqaruv yo‘nalishlarida dunyoning nufuzli oliy o‘quv yurtlari bilan hamkorlikda turli taʼlim dasturlarini ilgari surib kelmoqda. Bundan tashqari, institutda bank va biznes boshqaruviga oid chuqur tadqiqotlar o‘tkazilmoqda, yuzlab yoshlar yetakchi davlatlarda amaliyot o‘tab, zamonaviy bilim va ko‘nikmalar orttirmoqda. Bu borada institut to‘plagan tajriba biz bilan hamkorlikda ham yuqori natija berishiga umid qilayapmiz.
Mazkur qo‘shma taʼlim dasturiga ko‘ra, O‘zsanoatqurilishbank xodimlari risk-menejment, komplayens-nazorati, audit, biznes tahlil, loyihalarni boshqarish kabi sohaning muhim yo‘nalishlari bo‘yicha qayta tayyorlanib, malakasi oshiriladi. Angliya, Germaniya, Singapur, Koreya va Shveysariyadagi yetakchi o‘quv markazlarida amaliyot o‘tash imkoniyatiga ega bo‘ladi.
Joriy yil davomida dastur doirasida Bosh bank, front va bek-ofis xodimlari hamda top-menejerlardan iborat 3,5 mingdan ziyod kadrlar o‘qitilib, ularning FRM, CHFA, ACHChA, PMI kabi xalqaro sertifikatlarni olishiga ko‘maklashish rejalashtirilgan.
Reklama huquqi asosida.
Izoh (0)