Ўзбекистоннинг Владивостокдаги Бош консуллиги кўмагида мураккаб аҳволга тушиб қолган мамлакат фуқароси Россиянинг Узоқ Шарқ минтақасидан ватанга қайтарилди. Бу ҳақда “Дунё” агентлиги хабар берди.
Қайд этилишича, 10 октябрь куни Владивостокдаги “Парус надежди” махсус социаллаштириш маркази ходимлари Бош консулликка мурожаат қилиб, 2006 йилда туғилган, вояга етмаган Ўзбекистон фуқароси О.К. қонуний вакилларисиз ҳамда Россия қонунчилигини бузган ҳолда Россиянинг Приморский ўлкасида бўлиб тургани ва мазкур муассасада сақланаётганини билдирган.
Шу боис ўзбекистонлик дипломатлар марказ раҳбарияти билан музокаралар олиб бориши натижасида13 октябрь куни О.К. тоғаси ҳамроҳлигида Қирғизистонга, сўнгра чегара пости орқали Андижон вилоятига ўтказилиши таъминлангани ҳолда ота-онасининг ҳузурига етказилган.
Бундан олдин Россияга ишлаш учун бориб, вафот этган аёлнинг 9 ёшли қизи Ўзбекистонга қайтарилгани тўғрисида хабар берилганди. Шунингдек, Мисрда автоҳалокатга учраб, оғир тан жароҳати олган ўзбекистонлик аёл ватанга қайтарилган, Россияда эри қамалиб, чақалоғи билан қийин аҳволда қолган аёлга ёрдам кўрсатилган эди.
Изоҳ (0)