Фотима Сана Шайх экранда спортчи Гита Фогат образини акс эттирган “Дангал” фильмидаги маҳоратли ижроси туфайли томошабинлар эътиборини тортади. У, шунингдек, актёр Амир Хоннинг қалбини ҳам забт этади. Улар орасидаги 27 ёшли фарқ актёрнинг иккинчи хотини Киран Рао билан ажрашишига тўсқинлик қилмади.
Фотима Сана Шайх Болливуддаги энг истиқболли актрисалардан бири. Фотима 1992 йил 11 январда Андҳра-Прадеш штатининг Ҳайдаробод шаҳрида туғилган. Унинг отаси Випин Шарма кашмирлик ҳинд, онаси Раж Табассум эса шринагарлик мусулмон.
Қизи туғилгандан сўнг, ота-онаси Мумбайга кўчиб келади ва Фотима шу ерда ўсиб, таълим олади. Қиз кинодаги фаолиятини 5 ёшида бошлаган ва кўплаб юлдузли фильмларда роль ўйнаган. Режиссёрлар унинг харизмаси ва жозибасини ўша пайтдаёқ пайқаган.
Ёш актрисани Шоҳрух Хон, Жухи Чавла ва Жеки Шрофф иштирокидаги “Васийлик” ёки “Ёлғиз қолганда” фильмларида ҳам кўриш мумкин. Ушбу фильмда суратга тушганидан сўнг, Шайх ўқишга эътибор қаратиш учун фильмлардан танаффус олади. Бир мунча вақт ўтгач, у шоу-бизнесга қайтади, бу Фотима учун унчалик осон бўлмаган. Кўп кастингларга қарамай, актрисага узоқ вақтгача роль берилмайди.
У “Акаш ва Вани”, “Ҳақиқий профессионал”, “Таҳан” каби лойиҳаларда фақат кичик ролларни ўйнаган. Бўш вақтини бекор ўтказмаслик учун Фотима фотограф бўлиб ишлай бошлайди. У шунингдек, иккита реклама роликларида оператор бўлиб ҳам ишлаган ва бир нечта телесериалларда суратга тушган.
Сана Шайхга ҳақиқий машҳурликни 2015 йилда — Амир Хон билан бирга ўйнаган Нитеш Тиварининг “Дангал” драмаси олиб келди. Фильм Ҳаряна штатидаги Балали қишлоғида яшовчи собиқ курашчи Маҳавир Сингҳ Фогатнинг ҳаёти ҳақида бўлиб, у қизлари Гита ва Бабитага эркаклар иштирок этадиган спортда тарихий ғалабаларни қўлга киритишларида ёрдам беради.
Ҳамдўстлик ўйинларида кураш бўйича Ҳиндистон тарихидаги биринчи олтин медални қўлга киритган Гита Фогат роли учун дастлаб Таапси Панну ва Кангана Ранаут кўриб чиқилади, шунинг учун Фотиманинг танланиши кутилмаган бўлади.
Шайх ўзининг ҳамкасби Сония Малҳотра билан бирга беш карра кастингдан ўтади. Кейин машаққатли жисмоний машғулотлар ва актёрлик маҳорати дарслари бўлади. Сония Малҳотра учун “Дангал” дебют фильм эди. Фильм 2016 йилда экранларга чиқади ва катта танқидларга учрайди, аммо энг юқори даромад келтирган ҳинд фильмига айланади.
Айнан шу фильмнинг суратга олиш майдончасида Амир Хон 24 ёшли Фотиманинг жозибасига мафтун бўлгани ҳақида миш-мишлар тарқалади. Актёрнинг иккинчи хотини Киран Рао билан ажралиши эса оловга мой қуяди. Ижтимоий тармоқларда Шайх ва Хоннинг қўлларини маҳкам ушлаган суратлари пайдо бўлади, бироқ жуфтлик ўрталаридаги муносабатларга изоҳ бермасликни маъқул кўради.
“Дангал”дан сўнг дарҳол Амир Хон ўзининг навбатдаги лойиҳаси “Ҳиндистон тўдалари” фильмида Фотима билан суратга тушади. Унда қиз актёрнинг севгилиси малика Зафира ролини ўйнайди. Афсуски, катта бюджетга ҳамда Амирдан ташқари Амитабҳ Баччан ва Катрина Каифни ўз ичига олган юлдузлар таркибига қарамай, фильм Ҳиндистонда муваффақият қозонмайди — картина кассада муваффақиятсизликка учрайди.
Бундай омадсизликдан кейин Фотима “Лудо”, “Йўловчи” ва “Саёҳат” каби кичикроқ лойиҳаларда иштирок этади. Ўтган йили актриса Ҳиндистоннинг биринчи фельдмаршали Сэм Манекшоу ҳаётига асосланган “Сэм Баҳодур” биографик жангари драмасида роль ўйнади. Унда Фотима Индира Ганди ролини ижро этган.
“Сэм Баҳодур” кассада Ранбир Капурнинг мега блокбастери “Ҳайвон” билан бир вақтда экранларга чиққанига қарамай, кинотеатрларда яхши кетади ва хит деб эълон қилинади.
“Лаал Сингҳ Чадда” фильми муваффақиятсизликка учрагач, актёрлик фаолиятида танаффус қилган Амир Хон ҳозирда катта экранга қайтишга тайёр. Табиийки, у Фотима Сана Шайхни ўзига партнёр қилиб олди. Уларнинг биргаликдаги янги фильмига Адваит Чандан режиссёрлик қилади ва суратга олиш ишлари 2024 йилнинг биринчи ярмида бошланиши режалаштирилган.
Жуфтлик муносабатларини яширмайди, гарчи улар буни омма олдида тан олмасалар ҳам — Фотима ҳамиша Амирнинг ёнида бўлиб, унинг барча оилавий байрамларида қатнашади.
Изоҳ (0)