Rossiya bir qator “do‘st bo‘lmagan davlatlar” hududidagi konsulliklarida prezidentlik saylovlari uchun ovoz berish uchastkalarini tashkil qilmaydi. Bu haqda diplomatik doiralardagi manbalarga tayanib, “Vedomosti” xabar berdi.
Ma’lum qilinishicha, gap tegishli hukumat ro‘yxatiga kiritilgan barcha 49 davlat haqida emas, balki ularning salmoqli qismi haqida ketmoqda. Bu borada yakuniy qaror hali qabul qilinmagan, maslahatlashuvlar davom etmoqda. Tegishli masala bo‘yicha yakuniy qaror yanvar oyida qabul qilinishi kerak.
“Ushbu qarorning sababi saylovchilar xavfsizligi (masalan, 2018-yilda Yevropada elchixonalar oldida navbatlar paydo bo‘lgan), shuningdek, konsullik xodimlari sonining qisqarishi bilan izohlanadi”, — deyiladi xabarda.
Shu bilan birga, Rossiya Markaziy saylov komissiyasining xalqaro hamkorlik bo‘yicha mas’ul a’zosi Pavel Andreyev xorijda saylov uchastkalarini shakllantirish muddati 24-yanvar ekanini aytdi. Shu bilan birga, MSK ovoz berish kuniga besh kun qolganda ularni shakllantirishning mutlaq huquqiga ega.
“Xorijda ovoz berishning qamrovi aniqlanmagan bo‘lsa-da, Tashqi ishlar vazirligi va Rossiya diplomatik muassasalari mezbon davlatlarning rasmiy organlari bilan o‘zaro hamkorlik qilish, saylovchilar xavfsizligini qanday ta’minlashni baholash maqsadida xavf va imkoniyatlarni tahlil qilish bo‘yicha katta ishlarni amalga oshirmoqda”, — deydi rasmiy.
Rossiya Tashqi ishlar vazirligi rasmiy vakili Mariya Zaxarova departament “hozir vaziyatni o‘rganayotganini” aytdi.
“Biz davlatlardan xavfsizlikni taʼminlash bo‘yicha so‘raymiz va idoralararo o‘rganish natijalariga ko‘ra, chet elda ovoz berishni tashkil etish sxemasi bo‘yicha qaror qabul qilinadi”, — deya tushuntirdi Zaxarova.
Izoh (0)