Россия Марказий сайлов комиссияси журналист Екатерина Дунцовани президентликка номзод сифатида рўйхатга олишдан бош тортди. Бу ҳақда BBC хабар берди.
Маълум қилинишича, Марказий сайлов комиссияси Дунцовага номзод сифатида ўзини кўрсатиши учун зарур имзоларни тўплашга рухсат бермади. МСК номзодлик ҳужжатларида “100 та хато топгани” учун рўйхатга олишдан бош тортди. Комиссия, масалан, хатолардан бирида “Валеревна” ўрнига “Валериeвна” деб ёзилганини билдирди.
МСК аъзоси Евгений Шевченконинг айтишича, гуруҳ аъзоларининг 20 фоизи баёнотларида хатоликлар бўлган.
“Биз ҳужжатларни синчиклаб ўрганиб чиқдик ва улар ҳуқуқий меъёрларга риоя қилмасдан, шошқалоқлик билан тузилгандек таассурот олдик”, — деди у.
“Екатерина Сергеевна, сиз ёш аёлсиз, сизда ҳали ҳаммаси олдинда. Ҳар қандай минусни ҳар доим плюсга айлантириш мумкин, ҳар қандай тажриба тажрибадир”, — деди комиссия раҳбари Элла Памфилова МСК йиғилишида.
Шундан кейин Екатерина Дунцова МСК қарори устидан Россия Олий судига шикоят қилинишини айтди. Дунцова “Яблоко” партиясидан уни президентликка номзод сифатида кўрсатишга чақирди. Чунки унинг номзодини илгари сурган ташаббус гуруҳи иккинчи йиғилиш ўтказа олмайди.
- Екатерина Дунцова 16 ноябрь куни президентликка ўз номзодини кўрсатишини маълум қилди. У ўз қарорини “сўнгги ўн йил ичида мамлакат нотўғри йўналишда кетмоқда: ривожланиш учун эмас, балки ўз-ўзини йўқ қилиш йўли” билан изоҳлаганди.
- Дунцованинг веб-сайтида айтилишича, у урушни тўхтатиш, демократик ислоҳотлар ва сиёсий маҳбусларни озод қилиш тарафдори. Журналист президентликка номзодини қўйиш режасини эълон қилганидан кўп ўтмай, уни прокуратурага чақиришган ва “ВТБ” банк унинг номига пул ўтказмаларини блоклаган.
Изоҳ (0)