Россия президентлигига 33 киши ўз номзодини илгари сурди. Бу ҳақда Россия Марказий сайлов комиссияси раҳбари ўринбосари Николай Булаевга таяниб, “РИА Новости” хабар берди.
Хабарга кўра, 30 дан ортиқ киши Россиядаги президентлик пойгасида иштирок этиш истагини билдирган.
“Охир-оқибат, бор-йўғи 33 таси бор, менимча... 33 таси эълон қилди”, — деди Николай Булаев.
Россияда президентлик сайловлари 2024 йил 15 мартда бошланиб, 17 мартгача бўлиб ўтади. Амалдаги президент Владимир Путин ўз номзодини илгари сурмоқчи эканини маълум қилди. Шунингдек, Россия Либерал-демократик партиясидан (ЛДPR) Леонид Слуцкий номзоди, бирлашган “Партия роста” ва “Новиэ люди”дан давлат думаси спикери ўринбосари Владислав Даванков номзоди илгари сурилди.
Москва вилояти депутати Борис Надеждин Марказий сайлов комиссиясига номзодлик ҳужжатларини тақдим этгани маълум бўлди. Уни “Фуқаролик ташаббуси” партияси қўллаб-қувватлади.
Россия Марказий сайлов комиссияси журналист Екатерина Дунцовани мамлакат президентлигига номзод қилиб кўрсатиш бўйича ташаббус гуруҳини рўйхатга олишдан бош тортди. Комиссиянинг таъкидлашича, унинг номзодлик ҳужжатларида “100 та хато” аниқланган. Хатолар орасида имзоларнинг сифати ва имзо тўплаш ташкилотчисининг паспорт рақами нотўғри кўрсатилгани ўрин олган. Ҳолат юзасидан Екатерина Дунцова Россия Олий судига шикоят қилинишини айтди. У урушни тўхтатиш, демократик ислоҳотлар ва сиёсий маҳбусларни озод қилиш тарафдори бўлган.
Изоҳ (0)