Хитой сунъий йўлдош ташувчи ракетани учиргач, Тайван ҳукумати буни хавф деб ўйлаб, аҳолига нотўғри огоҳлантиришини юборди. Кейинроқ орол Мудофаа вазирлиги материкка ракета қолдиқлари тушгани ҳақида хабар берди.
Тайван аҳолисига мобил телефон орқали юборилган огоҳлантиришда парчалари оролга тушиши мумкин бўлган Хитой сунъий йўлдоши учирилиши ҳақида айтилган. Al-Jazeera нашрининг ёзишича, инглизча версияда огоҳлантириш “ҳаво ҳужуми” деган ибора билан ифодаланган. Мудофаа вазирлиги хато учун узр сўради.
“Хитой сунъий йўлдош учирди. Ракета Тайваннинг жанубий ҳаво ҳудудидан ўтганида траектория кутилмаганда атмосферани тарк этди”, — дейилади ҳарбий департаментнинг Х ижтимоий тармоғидаги (собиқ Twitter) баёнотида.
Хитой аэрокосмик фан ва технология корпорацияси (CASC) ракета муваффақиятли учирилгани ҳақида эълон қилди — сунъий йўлдош зонди қора туйнуклар ва бошқа космик ҳодисаларни қайд этишда қўлланилади.
Изоҳ (0)