Япония Украина учун душман дронларини аниқлаш тизимларини харид қилиш мақсадида НАТО траст фондига 37 миллион доллар ажратади. Бу ҳақда “РБК-Украина” Япония ташқи ишлар вазири Ёко Камикавага таяниб, хабар берди.
-2885vw30.jpg)
Киевдаги матбуот анжумани чоғида Япония ТИВ раҳбари рус қўшинларининг Украина шаҳарларига, жумладан, Киевга Янги йил байрамларида давом этаётган ҳужумларини қоралади. У, шунингдек, Япония Украинани қўллаб-қувватлашда давом этишини айтди.
“Мен Россия агрессиясидан узоқ вақтдан буён ўзини ҳимоя қилиб келаётган Украина халқининг жасоратига яна бир бор ҳурматимни изҳор қилмоқчиман. Япония Украинада яна тинчлик ҳукм суриши учун Украинани қўллаб-қувватлашга қатъий қарор қилган”, — дея вазирнинг сўзларидан иқтибос келтиради “РБК-Украина”.
Бундан ташқари, Камикаванинг маълум қилишича, Япония ҳукумати қиш мавсумини енгиб ўтишга ёрдам бериш учун Украинага бешта мобил газ турбинали генератор ва еттита трансформаторни топширган.
Ёко Камикава 7 январь куни эълон қилинмаган ташриф билан Киевга келган. Япониянинг Украинадаги элчихонаси таъкидлашича, бу унинг 2023 йил сентябрда лавозимга киришганидан кейин Украинага биринчи сафари. Камикава ташрифи давомида Украина ташқи ишлар вазири Дмитрий Кулеба билан учрашди, шунингдек, Буча ва Ирпенга ташриф буюрди.
Изоҳ (0)