Тошкент шаҳар экология бошқармаси Сергели ҳамда Янгиҳаёт туманларида фаолият олиб бораётган I ва II тоифага кирувчи ишлаб чиқариш корхоналарида атмосфера ҳавосини муҳофаза қилишга доир ишларни ўрганиш мақсадида мониторинг тадбирлари ўтказилганини маълум қилди.
Мониторинг тадбирлари 6 январь куни Тошкент шаҳар прокуратураси Тошкент шаҳар Экология, атроф-муҳитни муҳофаза қилиш ва иқлим ўзгариши бошқармаси, бошқарманинг Атроф-муҳит мониторинг, иқлим ўзгариши ва чўлланишга қарши курашиш (таҳлилий лаборатория) бўлими томонидан олиб борилди.
Мазкур назорат тадбирлари мобайнида туманда фаолият турларини амалга ошираётган бир қатор корхоналарнинг чанг-газ тозалаш ускуналарини иш фаолияти, чанг-газ тозалаш даражаси ҳамда атмосфера ҳавосига чиқаётган зарарли моддаларини камайтириш, экологик норматив ҳужжатлар асосида ишларни олиб бориш юзасидан кўрсатмалар берилди.
“Айни пайтда экологлар экологик кўчма лаборатория ёрдамида мониторинг рейдларини ўтказмоқда ва ҳаводаги зарарли заррачалар миқдорини ўлчамоқда. Биринчи навбатда йирик корхона ва заводлар жойлашган ҳудудлар текширилмоқда. Келгусида бундай тадбирлар ҳафтада 2-3 марта ўтказилади”, — дея маълум қилган Тошкент шаҳар Экология бошқармаси матбуот хизмати.
Яқинда блогер Никита Макаренко Сергели ва Янгиҳаёт туманларидаги бир қанча йирик заводлар атмосферага катта миқдорда зарарли моддалар чиқараётганини, уларда филтр ўрнатилиши кераклиги, аммо қимматлиги сабабли ўрнатишмагани ҳақида ёзганди.
Ҳозирда ҳамкорликдаги ўрганиш тадбирлари давом эттирилмоқда.
Изоҳ (0)