“Ўзгидромет” 2023 йил 29—31 декабрь ва 2024 йил 1—2 январь кунларига об-ҳаво прогнозини эълон қилди.
Унга кўра, 29 декабрь куни республика ҳудудига совуқ ва нам ҳаво кириб келади. Кун давомида ҳаво ҳарорати аста-секин пасаяди, ёмғир ёғиши давом этиб, баъзи жойларда қорга айланади.
Республика бўйича баъзи жойларда шамол тезлиги 17-22 метр/секундгача кучайиши кутилмоқда.
30 декабрь, шанба куни Ўзбекистон ҳудуди бўйича нисбатан совуқ об-ҳаво бўлади, ёғингарчилик кутилмайди, фақат республиканинг тоғли ҳудудларида баъзи жойларда бир оз қор ёғиши мумкин. Ҳарорат кечаси 0-5 даража, шимолда 6-9 даража совуққача пасаяди, кундузи 2-7 даража илиқ атрофида бўлади.
Қайд этилишича, бу йил ҳам Ўзбекистон аҳолиси Янги йил байрамини қорсиз кутиб олади. 31 декабрь ва 1 январь кунлари республиканинг барча ҳудудларида ёғингарчиликсиз об-ҳаво бўлиши кутилмоқда.
Кечалари совуқ сақланиб туради, кундуз кунлари эса ҳаво ҳарорати аста-секин кўтарилади ва 1 январга келиб 10-13 даража илиққа етади. Қуруқ об-ҳаво 2 январда ҳам сақланиб туради, лекин бир оз совуқ ҳаво кириб келиши ҳисобига кундузги ҳарорат 6-9 даража илиққача пасаяди.
Республика бўйича баъзи жойларга туман тушиши кутилмоқда.
Изоҳ (0)