ҲАМАСнинг Исроилга ҳужуми чоғида гаров олинган беш нафар исроилликнинг жасади Ғазо сектори шимолидаги Жабалия шаҳрида ерости туннелидан топилди. Бу ҳақда 24 декабрь куни кечқурун Исроил мудофаа кучлари матбуот хизмати хабар берди.
Хабарга кўра, ҲАМАСнинг таянч марказларидан бири ҳисобланган Жабалиядаги ҳарбий операция давомида исроиллик ҳарбийлар яшириниш, қурол ишлаб чиқариш ва сақлаш учун фойдаланиладиган кенг туннеллар тармоғини аниқлаган. ҲАМАС ерости штаб-квартираси икки поғонадан иборат бўлган — биринчиси тахминан ўн метр чуқурликда, иккинчиси — бир неча ўн метр чуқурликда.
“Тармоқ Исроилга ҳужумга бошчилик қилган ҲАМАС шимолий бригадаси қўмондони Аҳмад Андур қароргоҳига олиб борувчи шахтага уланган”, — деди Исроил армияси вакили контр-адмирал Даниэль Ҳагарий.
Исроил қўшинлари туннеллар тармоғида топилган жасадларни олиб чиққан. Булар: генерал Зив Дадо, сержант Рон Шерман, капрал Ник Бейзер ҳамда тинч фуқаролар Эден Закария ва Элиа Толедано. Қурбонларнинг жасадлари дафн қилиш учун Исроилга етказилди.
Амалиёт якунида ҲАМАСнинг ерости қароргоҳи ва туннеллар тармоғи йўқ қилинди, деб қўшимча қилди Исроил ҳарбийлари. Улар ушбу оперция айнан қачон ўтказилганини ошкор қилмади.
Аввал Исроил ва ҲАМАС вақтинчалик сулҳ тузган эди. Ғазо секторида ўт очишни тўхтатиш келишуви 24 ноябрь куни кучга кирди. 27 ноябрда икки кунга, 30 ноябрда эса яна бир кунга узайтирилди. Келишув доирасида ҲАМАС 105 нафар гаровга олинганларни, жумладан, 20 дан ортиқ бошқа давлат фуқароларини озод қилди (улар алмашув рўйхатидан ташқари қўйиб юборилган). Бунинг эвазига Исроил ҳукумати 210 нафар фаластинликни қамоқдан озод қилди. 1 декабрь куни Ғазо секторида жанглар қайта бошланди.
ҲАМАС 7 октябрь кунги Исроилга ҳужуми чоғида жами 240 га яқин одамни гаровга олганди.
Изоҳ (0)