Исроил Ўрта Ер денгизи қирғоқлари бўйлаб ҲАМАС фойдаланадиган туннелларни сув билан тўлдириш ва жангчиларни сиқиб чиқариш учун йирик насослар ўрнатгани маълум қилинди. BBC мухбири бунинг эҳтимолини баҳолади.
Ҳолат юзасидан Исроил ҳарбийларига мурожаат қилинган. Улар бу хабарни текшираётганликларини айтган. BBC Исроилнинг ҲАМАС туннелларини сувга тўлдириши эҳтимолини мустақил равишда тасдиқлай олмаган, бироқ айрим маълумотлар бунинг эҳтимолини тасдиқлайди.
2015 йилда Миср Ғазо чегарасидаги юзлаб туннеллар тармоғини сувга тўлдириш ва контрабанда савдосига чек қўйиш учун Ўрта Ер денгизи сувидан фойдаланган. АҚШ расмийларига таяниб, Wall Street Journal газетасининг хабар беришича, Исроил армияси ўтган ой ўрталарида Ғазо шаҳри шимолида бешта насос ўрнатишни якунлаган. Улар бир неча ҳафта ичида Фаластин ҳудудидан ўтувчи туннелларнинг катта тармоғини сув билан тўлдириши мумкин.
Бу ҲАМАС “хавфсиз жойларда ва туннелларда” яширганини айтаётган исроиллик гаровга олинганлар ҳаётини мураккаблаштирувчи омил бўлади. Шунингдек, Ғазо секторининг ерости сув қатламига зарар етказиши ва асосий сув таъминотини ифлослантириши мумкин.
2021 йилдаги конфликтдан сўнг Исроил армияси ҳаво ҳужумлари натижасида 100 километрдан ортиқ туннелларни вайрон қилганини айтган. Шу билан бирга, ҲАМАС туннелларининг узунлиги 500 километр бўлганини ва атиги 5 фоизи шикастланганини маълум қилган.
“Ҳаммаси бўлиб мингдан ортиқ шундай туннеллар мавжуд, уларни 1300 та деб аташади. Туннелларда ҲАМАС жангарилари барча керакли нарсалар, жумладан, сув, озиқ-овқат, генераторлар, қурол омборларини сақлайди”, — дейди Сиёсий тадқиқотлар институти директори Сергей Марков.
Изоҳ (0)