Ўтган икки ой давомида Ўзбекистондаги АЁҚШларда 25 та қоидабузарлик ҳолати аниқланди. Бу ҳақда Рақобатни ривожлантириш ва истеъмолчилар ҳуқуқларини ҳимоя қилиш қўмитаси хабар берди.
Маълум қилинишича, қўмита “Ўзэнергоинспекция” билан ҳамкорликда аҳолини сифатли бензин маҳсулотлари билан таъминлаш ҳолатини ўрганиш мақсадида 2023 йил ноябрь—декабрь ойларида Республиканинг барча ҳудудларида жойлашган АЙҚШларда бензин маҳсулотларининг назорат харидлари ўтказди.
Ушбу ўрганиш тадбирлари давомида 82 та АЁҚШлардан харид қилинган бензин маҳсулотлари, белгиланган тартибда тегишли лабораторияларга тақдим этилган ва уларнинг дастлабки қисми бўйича маълумотлар олинган.
Бугунги кундаги дастлабки ўрганишлар натижасида (лаборатория таҳлилларига асосан) 21 та ҳолатда бензин маҳсулотларининг сифати белгиланган талабларга жавоб бермаслиги, 4 та ҳолатда эса белгиланган миқдордан кам қуйиш ҳолатлари аниқланган.
Ушбу ҳолатлар Қорақалпоғистон Республикаси, Андижон, Бухоро, Жиззах, Қашқадарё, Сирдарё, Фарғона ва Тошкент вилоятларидаги АЁҚШларда кузатилган.
Бунда, дастлабки ўрганишларга кўра жами истеъмолчиларга 300 миллион сўмга яқин зарар етказилгани аниқланган.
Изоҳ (0)