Фарғона водийси вилоятларига бензин ҳажми оширилади

Фарғона водийси вилоятларига бензин ҳажми оширилади. Бу ҳақда “Ўзбекнефтгаз” матбуот хизмати хабар берди.

Маълум қилинишича, водийдаги газ заправкалар фаолиятига қўйилган вақтинчалик чекловлар сабабли Андижон, Наманган ва Фарғона вилоятида бензинга бўлган талаб таклифга нисбатан кескин ошди.

Юзага келган мазкур ортиқча талабларни қондириш мақсадида бугунги кунда Бухоро ва Фарғона нефтни қайта ишлаш заводларининг автобензин ишлаб чиқариш қувватлари 3,3 минг тоннадан 4 минг тоннага оширилди ёки ўртача кунлик 700 тонна қўшимча автобензин ишлаб чиқарилиши йўлга қўйилди.

Шунингдек, Россиядан импорт асосида SDK Group And корхонаси томонидан олиб келинаётган Аи-92 К5 русумидаги автобензин ҳажми оширилди. Бу билан ички бозорда биржа савдоларига чиқариладиган автобензин миқдори савдосини оширишга эришилди.

Юқоридагилардан ташқари, Фарғона нефтни қайта ишлаш заводи томонидан ишлаб чиқарилган автобензиннинг асосий қисми Фарғона водийси истеъмолчиларига етказиб берилиши таъминланмоқда.

Истеъмолчиларга қулайлик яратиш мақсадида Фарғона водийсида Call-марказ ишга туширилди. Энди истеъмолчилар ҳафтанинг 7 куни давомида соат 08:00 дан 20:00 гача нефть базалар билан боғланиб, автобензин таъминоти бўйича маълумот олиши мумкин:

• Андижон вилояти — (90) 759-00-27;
• Наманган вилояти — (97) 251-70-00;
• Фарғона вилояти — (73) 244-78-80.

Қайд этилишича, 13 декабрь куни “Ўзбекнефтгаз” томонидан Фарғона водийсидаги АЁҚШларга жами 929 тонна жумладан, Андижон вилоятида 503 тонна, Наманган вилоятида 202 тонна ва Фарғона вилоятида 224 тонна автобензин етказиб берилди.

Энергетика вазири Жўрабек Мирзамаҳмудов “Дарё” нашрига берган интервьюсида Метан заправкаларда тақчиллик кузатилса, унга тенг миқдорда бозорга бензин чиқарилишини айтганди.