Чехия ҳукумати Россия элчихонасига Прага ва бошқа шаҳарлардаги ерлардан текин фойдаланиш ҳуқуқини берувчи Совет давридаги қарорларни бекор қилди, деб ёзди Чехиянинг Европа ишлари бўйича вазири Мартин Дворяк Twitter’да.

СССР ва ундан кейинги Россия элчихоналари ердан текин фойдаланишини назарда тутувчи 9 та қарор Чехословакия ҳукумати томонидан 1972—1980 йиллар оралиғида қабул қилинган. Дворякнинг сўзларига кўра, ўша вақтдан буён Россия Чехиядаги катта ер участкаларидан фойда кўрган ва Украинадаги босқинни қўллаб-қувватлаган бўлиши мумкин.

“Мамлакатимиз босиб олингандан кейин рус замбаракларининг ўқи остида қабул қилинган ҳукумат қарорларини бекор қилдик” — деди у 1968 йилда Совет қўшинларининг Чехословакияга бостириб киришини назарда тутиб.

Гап Россия элчихонаси томонидан “дипломатик мақсадларда” фойдаланилмаётган 59 та ер участкаси ҳақида бормоқда. Улар Прагада, Карлови Вари (Ғарбий Чехия), Брно (республиканинг жануби-шарқида) ва мамлакатнинг бошқа ҳудудларида жойлашган.

ОАВ маълумотларига кўра, ушбу майдонларда 25 та бино жойлашган.

ČТК ахборот агентлиги хабарига кўра, Россия элчихонаси ушбу ер участкаларидан келгусида ижара битимлари ёки Чехия манфаатларига жавоб берадиган бошқа қарорлар асосида фойдаланиши мумкин бўлади.

Таъкидланишича, Россия фойдаланаётган ер участкаларининг умумий майдони 92 001 квадрат метр майдонни эгаллайди, Россиядаги Чехия объектлари эса — 26,875 квадрат метр. 2020 йил июль ойида Республика Ташқи ишлар вазирлиги Россия элчихонасига нота йўллаб, бундан буён дипломатик мақсадларда фойдаланилмайдиган кўчмас мулк объектлари дипломатик ваколатхона биноси сифатида тан олинмаслигини билдирган эди.