Рақобатни ривожлантириш ва истеъмолчилар ҳуқуқларини ҳимоя қилиш қўмитаси 2023 йилнинг 11 ойи давомида инсофсиз рақобат ҳолатлари бўйича 300 га яқин мурожаат келиб тушганини маълум қилди.
Қайд этилишича, ушбу мурожаатлар юзасидан амалга оширилган ишлар натижасида 100 га яқин тадбиркорларнинг ҳуқуқлари ҳимоя қилиниши таъминланган.
Мурожаатлар бўйича 86 та ажрим чиқарилган, жумладан:
- қонунбузилиш аломатлари бўйича 62 та иш қўзғатилган ва белгиланган тартибда кўриб чиқилган;
- қонунбузилиш аломатлари мавжуд бўлмаганлиги сабабли 24 та ишни қўзғатиш рад этилган.
126 таси бўйича уларни белгиланган тартибда кўриб чиқиш учун зарур маълумотлар ва ҳужжатлар етишмаслиги сабабли ариза эгаларига қонунчилик талаблари тўғрисида тушунтиришлар берилган. Учтаси апелляция тартибида келиб тушган, шундан 2 таси кўриб чиқилган ва апелляция талаби қаноатлантирилган, Биттаси кўриб чиқилмоқда, учта бўйича ҳозирги кунда ўрганиш ишлари амалга ошириляпти.
Хусусан, IPlus МЧЖ (провайдер Comnet) ва Flink МЧЖ (провайдер Free Link) интернет провайдер сифатида бир товар бозорида, яъни абонентларни интернет тармоғига улаш ва хизмат кўрсатиш соҳасида фаолият юритади. IPlus МЧЖ қўмитага мурожаат қилиб, Flink МЧЖга нисбатан чора кўришни, у IPlus МЧЖнинг ишчанлик обрўсига путур етказиб, абонентлар ўртасида асоссиз маълумотлар тарқатганидан норози бўлиб шикоят қилган. Ишни кўриб чиқиш жараёнида қилинган мурожаат тасдиқловчи материаллари билан ўз исботини топган. Мурожаат ўрганиб чиқилиб, Flink МЧЖга нисбатан белгиланган тартибда иш қўзғатилган.
Махсус комиссия томонидан Flink МЧЖни “Рақобат тўғрисида”ги қонуннинг рақобатчини обрўсизлантириш, яъни рақобатчи хўжалик юритувчи субъектнинг фаолиятига салбий таъсир кўрсатиши ёки унинг ишчанлик обрўсига путур етказиши мумкин бўлган ҳолатни содир этган деб топилган ва Flink МЧЖга қонунбузилиш ҳолатини бартараф этиш ҳамда келгусида бундай қонунбузилиш ҳолатига йўл қўймаслик тўғрисида кўрсатма берилган.
Шунингдек, Қўмита Махсус комиссиясининг 2023 йилдаги тегишли қарорларига кўра Sunrise International Trade МЧЖ ва Dubai cars МЧЖ ўзларининг фаолиятида “Рақобат тўғрисида”ги қонунининг тегишли моддалари талабларини бузган деб топилган ва уларга ушбу қонунбузилиш ҳолатини бартараф қилиш тўғрисида кўрсатма берилган.
Лекин ушбу МЧЖлар томонидан бир неча бор қўмита талаблари бажарилмагани ва бу бошқа бир тадбиркорлик субъектларининг ҳуқуқларини бузаётгани сабабли Рақобат қўмитаси томонидан МЧЖ раҳбарларига маъмурий баённома расмийлаштириш учун уларни олиб келиш юзасидан ИИВнинг Тошкент шаҳар ва Сирдарё вилояти бошқармаларига мурожаат киритилган.
Изоҳ (0)