“Ўғирланмаган келин”, “Ўткинчи дунё”, “Девдас”, “Вир ва Зара” ва бошқа фильмлар дунё томошабинларнинг қалбини забт этган ҳинд актёри Шоҳрух Хон 2 ноябрь куни 58 ёшни қарши олди. Шу муносабат билан қуйида маҳоратли ҳинд актёрининг ҳаёти, ижод йўли ва рафиқаси Гаури Хон билан қандай танишгани ҳақида сўз юритилади.
Шоҳрух Хоннинг оиласи ва болалиги ҳақида
Болливуд актёри Шоҳрух Хон Ҳиндистонда туғилган, бироқ унинг асли келиб чиқиши эронликларга бориб тақалади. Бўлажак актёрнинг ота-онаси адвокат бўлгани ҳамда яхши пул топгани бўлажак актёрнинг ҳаётида катта ёрдам берган. У болалигиданоқ мактаб театр жамоаси таркибида турли хил саҳна кўринишларида иштирок этади. Шунингдек, спортнинг югуриш турини жуда яхши кўрган ва ҳатто шаҳар мусобақаларида ҳам ғолиб бўлган.
Спортда эмас, кино оламда муваффақият қозонган актёр
Мактабни тугатиш арафасида Шоҳрух Хоннинг олдида икки йўл турарди: спорт ёки санъат. У спортни танлади, бироқ охирги тиббий кўрикда унга юрак касаллиги ташхисини қўйилди. Шундан кейин Хон актёр бўлишга қарор қилади. Аммо ўша пайтда отасининг вафоти ва онасининг қистови билан биринчи иқтисодчи маълумотини олишга киришди. Институтда ўқиш мобайнида ҳам театрда рол ўйнашни давом эттирди. У аллақачон профессионал актёр бўлишни хоҳлаётганига қатъий ишонган эди.
Рекламалардан юқори даромад топади
Актёр кинодаги гонораридан ташқари, рекламалардан ҳам анчагина даромад олади. Норасмий маълумотларга кўра, унинг умумий бойлиги 800 миллион доллардан ошиб кетган. Бундай бойликка эга актёр кўплаб хайрия ишларидаги фаол ташаббуси билан мухлислари қалбидан янада чуқур жой эгаллаган.
Севги тарихи
Шоҳрух Хон рафиқаси Гаури Чибберни илк марта 1984 йилда, 18 ёшида дўстининг уйида ташкил этилган базмда кўрган. У Гаурини бошқа бола билан рақсга тушаётганини кўради, бироқ унинг уятчан табиати туфайли яқинлашишдан қўрқади. Ниҳоят актёр ўзида куч топгач, уни рақсга таклиф қилди, Гаури эса йигитини кутаётганини айтиб, Шоҳрух Хонни рад этади. Шу пайтда Шоҳрухнинг севги ҳақидаги орзулари пучга чиқади.
Аслида, Гаурининг “дўсти” йўқ эди, у зиёфатга бирга келган укасини кутаётган эди. Шоҳрух ўз интервьюсида бундан хабар топгач, Гаурига қўнғироқ қилиб: “Мени укангиз билан таништирасизми?” — деб сўраганини эслайди. Шундан кейин, уларнинг гўзал муносабатлари бошланди.
Гаури Шоҳрухнинг зукколиги, ишончи ва услубига мафтун бўлади. Бироқ бу севгидан Шоҳрух Хон ўзини йўқотиб қўяди ва у Гаурининг бошқа йигитлар билан гаплашиши у ёқда турсин, унга сочини ёйиб юришни ҳам тақиқлайди. Айнан ўша пайтда Гаури бу муносабатлардан танаффус қилиш кераклигини тушуниб етади. Туғилган кунини Шоҳрух билан нишонлаган куннинг эртасига у билдирмай дугоналари билан Мумбайга жўнаб кетади.
Шундан кейин Шоҳрух Гаурини севишини англаб етади. Актёр жуда яқин бўлган онаси билан ҳис-туйғуларини баҳам кўради. Унинг онаси ўғлини нафақат сўз билан қўллаб-қувватлади, балки унга ёрдам бериш учун 10 000 рупий ҳам беради. Шоҳруҳ дўстлари билан бирга уни бутун шаҳардан қидириб, Гаурини соҳилда топгани ҳақида гапириб берган. Иккови ҳам бир-бирларининг кўзларига тикилиб, қучоқлашиб йиғлаган. Шу пайт улар алоҳида яшай олмаслигини тушуниб, турмуш қуришга қарор қилади.
Гаури ҳинду браҳманлар оиласига мансуб эди. Унинг отаси соф вегетариан эди ва ҳатто уларнинг уйида маъбуд ҳам бор эди. Шоҳрух Хон эса мусулмон бўлган. Гаурининг ота-онаси уларнинг муносабатларига рози бўлмаслиги аниқ эди. Сабаби, Ҳиндистонда дин муҳим аҳамиятга эга. Қолаверса, Шоҳрух ўша пайтда “ҳеч ким” бўлиб, вазият жуда беқарор бўлган.
“Ота-онам бизнинг никоҳимизга қарши эди. Улар бизни жуда ёш деб ҳисобларди, шунингдек, актёр бўлишни истаган мусулмон куёвни ҳам хоҳламас эди”, — дейди Гаури.
Шоҳрух ва Гаури кўп қийинчиликларни бошдан кечирган. Улар беш йил давомида ўз муносабатларини қариндошларидан яширишди ва ота-онасини севгиларининг жиддийлигига ишонтириш учун ҳамма нарсани қилишди. Ниҳоят, Шоҳруҳ Гаурининг ота-онасининг дуосини олишга муваффақ бўлди ва 1991 йил 25 октябрда улар турмуш қуришди. Актёр рафиқасини ҳурмат қилади: “Мен Гаурини жуда яхши кўраман. У менинг бир бўлагим”, — дейди Шоҳрух Хон. Гаури эса: “Шоҳруҳ менинг ҳаётимдаги биринчи ва ягона одамим”, — деб таъкидлайди.
Шоҳрух Хон ва Гаурининг турмуш қурганига 32 йил бўлган, шунга қарамай жуфтликнинг муносабатлари ҳали ҳам мустаҳкам. Улар уч нафар фарзандни: ўғиллари Арян ва Абрам ва қизи Суханани тарбия қилмоқда. Жуфтликнинг бир-бирига бўлган севгиси, садоқати, ишончи, нафақат кино оламдаги ва ундан ташқаридаги барча жуфтликлар учун ўрнак.
Изоҳ (0)